(AP) — E administracion di Biden a pidi un corte di apelacion federal ayera pa blokea un acuerdo di culpabilidad pa Khalid Sheikh Mohammed, e organisador acusa di e atakenan di 9/11, y dos co-sospechosonan cual lo yuda nan evita e castigo di morto.
E Departamento di Husticia a argumenta den un documento presenta na un corte di apelacion federal den Districto di Columbia cu e gobierno lo sufri daño ireparable si e tratonan di culpabilidad ta ser acepta. Nan a bisa cu e gobierno lo perde e oportunidad pa un huicio publico y pa “busca castigo di morto pa tres homberacusa di un acto di masacre masivo cu a causa e morto di miles di hende y a sacudi e nacion y e mundo.”
E hues militar na Guantanamo Bay y un hurado di apelacion militar a rechasa e esfuerso di Secretario di Defensa Lloyd Austin pa anula e trato di culpabilidad, argumentando cu e no tin poder pa haci esey despues cu un oficial mayor di e Pentagon pa Guantanamo a aproba e acuerdo na juli. Mohammed tabata prepara pa duna su declaracion di culpabilidad diabierna, mientras e dos co-sospechosonan tabata programa pa duna nan declaracion otro siman.
E documento di Departamento di Husticia a argumenta cu e sospechosonan, al contrario na e gobierno, no lo sufri do daño pa un retraso corto, considerando cu e proceso di acusacion ta andante desde 2012 y cu e acuerdonan lo probablemente resulta den sentencianan largo di prison, posiblemente pa resto di nan bida.
“Un retraso corto pa permiti e Corte evalua e merito di e peticion di gobierno den e caso aki no lo causa daño material na e respondientenan,” e gobierno a argumenta.
