Juan Adi Thijsen ta keda Presidente di Parlamento y su suplente ta Alvin Alan Howell. Ayera Parlamento a cera Aña Parlamentario 2019-2020 cu votacion pa Presidente y Vice Presidente di Parlamento di Aruba.
E reunion tabata cortico, mirando cu solamente tabatin dos punto di agenda cu e ta cuater votacionnan pa dos candidato pa e puesto Presidente y dos candidato pa e funcion di Vice Presidente. E otro punto di agenda tabata e ciere di Aña Parlamentario mes pa cual por a hiba palabra, pero ningun Parlamentario a pone nan nomber pa bisa algo. E miembronan presente tabata en total 18.
Pues, mesora despues di a habri e reunion, a forma un comision di eleccion cu tabata consisti di Setty Christiaans Yarzagaray, Ricardo Croes y Robert Candelaria cu a controla e votacion cu tabata secreto.
Aki, Juan Adi Thijsen a ricibi 11 voto pa keda como Presidente di Parlamento, sigui pa Mervin Wyatt Ras cu a ricibi 6 voto. Tabatin un voto blanco. E di dos candidatonan pa Presidente di Parlamento tabata Edgard Vrolijk y Jennifer Arends Reyes, y aki Vrolijk a ricibi 10 voto, Arends Reyes a ricibi 6 voto y tabatin dos voto blanco.
Alvin Alan Howell a bira Vice Presidente di Parlamento cu 10 voto, y Jennifer Arends Reyes a ricibi 6 voto, cu dos voto blanco. Aki tabatin e unico momento di accion, mirando cu e votacion mester a bay a base di e nomber completo y corecto. Parlamentario Howell a haya 9 voto cu a uza su nomber completo, y a haya un voto unda a uza e nomber cu e ta conoci pe. Pero mirando cu e ta e unico Howell den Parlamento, Griffier a conseha Presidente di Parlamento pa considera e di 10 voto como valido.
E otro candidatonan pa Vice Presidente tabata Jan Hendrik ‘Endy’ Croes cu a haya mayoria di e votonan.
Mirando cu no tabatin ningun hende cu kier a hiba palabra, Presidente di Parlamento, Juan Adi Thijsen, despues di gradici Cuerpo Policial, Cuerpo Especial Arubano pa nan asistencia na tur reunion, a cera e ultimo reunion pa 2019-2020 den menos di un ora.
Awe tin e Apertura di Aña Parlamentario 2020-2021.
