57 registracion pa Request For Expression Of Interes (REOI) 1 y 44 registracion pa REOI 2, esaki tabata e resultado total cu Notario, Chamila Tromp, a informa diabierna ultimo di e compania interesa riba infrastructura di refineria na San Nicolas, administra pa e compania estatal Refineria di Aruba (RdA).
E director di Refineria di Aruba (RdA) Sr. Rennie Arends a laga sa cu e proceso di evaluacion di e companianan interesa lo cuminsa inmediatamente, y na e momento corecto nan lo informa prome minister tocante e resultadonan preliminar.
Pa REOI 1 e interesadonan pa expresa nan interes den reapertura di refineria. Of tambe riba industrianan relaciona cu refineria y energia. Riba REOI 2, gobierno y RdA a habri posibilidad pa interesadonan expresa tambe nan interes den cualkier tipo di desaroyo industrial cu lo por bira un fuente di trabao y desaroyo economico na e refineria.
Sr. Arends a referi cu gobierno y RdA a bin cu aviso publico cu a stipula e condicionnan pa esunnan cu a expresa nan interes riba e destaho publico REOI 2. E actividadnan nobo mester contribui significativamente riba mercado laboral y desaroyo economico di Aruba. Ademas nan actividadnan mester cumpli cu e leynan y regulacion ambiental. Igualmente e actividadnan mester cumpli cu e politica di asuntonan exterior di reino Hulandes y tambe cu e politica di oficina di control di activo stranhero di Merca.
Director di RdA a expresa cu Aruba tin un experiencia di casi 100 aña den industria di refineria cu a marca un desaroyo economico pa nos pais. Ademas e refineria a hunga un rol grandi durante II Guera Mundial como un fuente cu a abastece di combustibel e forsanan aliado. Den su pico di capacidad a ofrece trabao pa aproximadamente 10 mil persona. Tambe el a yega di contribui cu un 10% Aruba su GDP.
