Den Haag por prepara pa un demostracion nobo posiblemente grandi contra e gabinete. Trahadonan di construccion a planea un dia di accion nacional pa diaranson 30 di october proximo, cual mester tuma luga riba Malieveld. Riba Facebook den algun par di dia a confirma nan asistencia miles di persona y miles mas a mustra interesa.
E protesta ta orienta, igual na esun di e criadonan di bestia siman pasa cu a paralisa Hofstad, contra e reglanan di nitrogeno, pero principalmente riba e problema mas grandi ainda pa sector di construccion: PFAS. E grupo di material venenoso ta consisti di 6 mil elemento, di cual 1,500 posiblemente ta causa cancer. Mediante un norma cu Secretario di Estado Stientje van Veldhoven a pone aña pasa, un cantidad grandi di tera, gordura of santo no por ser cumpra of transporta te ora cu investigacion revela con peligroso PFAS ta en berdad.
“Wardando e investigacionnan ey nan a laga henter e sector di construccion y infrastructura keto”, segun excavador Klaas Kooiker. E ta un di e personanan cu a tuma iniciativa pa e dia di accion. “E yegada simultaneo di reglanan pa nitrogeno y PFAS a ocasiona un retraso enorme. Nos ta ripara mas awo cu a bira keto cu pedido. Trabounan cu tabata andando caba, sea ta stop nan of entrega di e tera ta bira dies biaha mas caro.”
Kooiker no kier bisa nada ainda tocante e contenido di e demostracion na Den Haag. “Nos ta bay laga cla cerca gobierno cu algo mester pasa hopi lihe. Nos kier pa investiga PFAS bon prome cu tur cos wordo para. Esey mester sucede rapidamente.”
E investigacion di RIVM riba PFAS lo keda cla proximo aña. Van Veldhoven a bisa cu no lo warda te e ora ey pa pasa e reglanan. Pero el a priminti di bay den dialogo cu e sector di construccion. “Nos lo sigura pa ningun proyecto keda para innecesariamente.”
