Diarionan skirbi na man conteniendo referencianan anti-Semitico a ser haya den cas di e homber acusa cu crimen federal di odio ayera, den un caso di hincamento di cinco persona celebrando Hanukkah na cas di un rabbi nort di New York City, segun autoridadnan.
Grafton E. Thomas di 37 aña di edad a ser teni sin fiansa despues di presenta den corte federal na White Plains enfrentando cinco cargo di obstruccion di ehercicio liber di creencia religioso door di intenta di mata cu un arma peligroso y causa herida den e atake diasabra. Autoridadnan a bisa cu a haya un machete di 45cm mancha cu sanger den su auto.
Thomas, cu su enkel mara, a bisa un hues kende a puntr’e si su cabes ta ‘clear’ el a bisa cu e tabata ‘not clear at all’ (no claro en absoluto) y tabatin mester di drumi. Pero el a agrega ‘mi ta coherente’.
Su abogado nombra pa corte, Susanne Brody, a bisa cu Thomas tin problema cu desorden bipolar y schizophrenia.
E hincamento riba e di shete anochi di Hanukkah ta yega entre un serie di atake violento enfoca riba hudiunan den e region, cu a hiba na aumento di siguridad, particularmente rond di reunionnan religioso.
A informa cu a haya diarionan den cas di Thomas na Greenwood Lake, incluyendo comentarionan cuestionando ‘pakico hende ta yora pa anti-Semitismo ora tin genocidio Semita’ y un pagina cu dibuho di un Strea di David y un swastisa.
Un celular haya den su auto a inclui buskeda ripiti riba internet pa ‘pakico Hitler tabata odia hudiunan’ como tambe ‘tempel Hudiu Aleman cerca di mi’ y ‘companianan prominente funda pa hudiunan na Merca’.
Abogado di defensa Michael Sussman a bisa reporteronan cu el a bishita cas di Thomas y a haya cantidad di nota cu el a describi como e ‘papia loco di un individuo perturba’ pero nada pa punta na un ‘motibo anti Semita’ of sugeri cu Thomas ‘intencionalmente tabatin como obhetivo’ e cas di e rabbi. “Mi impresion di papia cune ta cu e mester evaluacion psikiatrico serio”, Sussman a bisa. “Su splicacionnan no tabata coherente.”
Thomas a sirbi den Marines y tabata presidente di su class na un scol secundario na Queens, segun Sussman. Su famia a bisa cu su salud mental a deteriora durante añanan. E lo scucha stem y tin problema pa papia.
Segun e cargonan, Thomas cu su cara tapa cu un scarf a drenta cas di e rabbi banda di porta di un sinagoga y a bisa ‘niun hende ta sali’. Despues el a saca un machete y a cuminsa corta y hinca persona den e cas unda tabatin decenas di creyente.
Gobernador Andrew Cuomo a bisa cu e atake diasabra tabata e di 13 atake anti-Semitico na New York desde dia 8 di december ultimo. Segun un oficial conecta cu e investigacion, autoridad no ta kere cu e casonan ta conecta.
