(ElPais) – Santiago, Chile – Un aña pasa practicamente ningun hende lo a kere cu esaki tabata posibel.

Merca a caba di bandona e combersacionnan den cual tabata finalisa e ultimo detayenan di e acuerdo di asociacion transpacifico (TPP, na Ingles), un di e proyectonan estelar di gobierno di Obama, y a cuminsa su travesia particular den e desierto di isolacionismo comercial.

E probabilidadnan cu e acuerdo lo sali dilanti sin e prome potencia mundial a bordo no tabata parce asina grandi. Pero tin ora cu loke ta improbabel tambe ta logra: 13 luna despues Mexico, Chile, Peru, Canada y shete pais di Asia (Brunei, Hapon, Malasia, Singapore y Vietnam) y Oceania (Australia y New Zealand) a seya diahuebs pasa na e capital Chileno un di e acuerdonan comercial mas grandi di mundo.

E firmamento a tuma luga algun ora prome cu gobierno di Trump a presenta su prome decreto grandi cu tarifa di importacion, cu ta pisa riba importacion di staal y aluminio, y memey di e negociacion di e tratado di liber comercio di Norte America, den cual Mexico y Canada ta hungando cu un bon parti di nan crecemento economico den e proximo añanan. E momento no por tabata mas simbolico pa manda un bon mensahe: tin bida mas aya di Merca.

Rebautisa tratado integral y progresista di asociacion pacifico y conoci como TPP11, despues cu Merca a baha di e barco, e acuerdo comercial ta conforma un mercado liber di importacion di 500 miyon consumidor, cu ta suma casi un sexto parti di e PIB mundial. Un gigante cu presencia na tres continente, y cu segun tur specialista den comercio internacional consulta, ta na vanguardia encuanto normativo y facilitacion di comercio cu un enfoke radicalmente nobo. E acuerdo lo drenta na vigor despues di aprobacion den por lo menos seis pais. Ken lo sa cu pa e tempo ey e prome guera comercial di e siglo aki ya lo a cuminsa.

“E TPP11 ta set e base di comercio di futuro”, Ignacio Bartesaghi, director di e Departamento di Negoshi Internacional y integracion di universidad catolico di Uruguay y autor di varios articulo academico tocante e tratado, ta comenta. “E ta un gran plataforma pa capta inversion cu ta posiciona e firmantenan claramente na vanguardia mundial encuanto standardnan y harmonisacion di normanan comercial. E lo mehora hopi e entorno di negoshi y lo permiti e paisnan aki adapta nan mes na e condicionnan comercial cu e resto di mundo tambe lo tin den futuro.”

“Ningun hende tabata pensa cu e acuerdo lo a sobrevivi sin Merca,” e titular Chileno di Relacionnan Exterior, Heraldo Muñoz, ta bisa. E prome medida di Donald Trump como presidente tabata e retirada di su pais di e tratado. El a habri asina un era nobo den cual Washington a pasa pa e banda di e poco opositornan di liberalisacion comercial. “E firmamento di e acuerdo aki, en cambio, ta un poderoso señal politico di apertura, di respaldo na e reglanan cla pa comercio internacional y di oposicion contra medida proteccionista,” e ministro anfitrion a declara na El Pais.