Ayera Federacion di Trahadornan di Aruba (FTA) den representacion di e empleadonan di Hilton Aruba Caribbean Resort & Casino a firma un protocol cu e empresa hotelero aki.
E acuerdo aki ta busca garantisa na e empleadonan un 80% di nan salario. Esaki mientras cu e crisis di coronavirus/Covid-19 ta continua y e hotel ta ricibi subsidio di Gobierno. E orario di trabao tambe lo wordo limita na maximo 80% di e orario regular.
Gobierno di Aruba por medio di un fianza otorga pa Hulanda ta ofreciendo e empresanan local cu mas ta wordo afecta door di e crisis aki, un subsidio di 60% di e gastonan di salario bou condicion cu ta mantene trahadonan cu empleo y entrada. Pa locual ta e diferencia (40%) ta keda na cada dunado di trabao pa yega na un acuerdo cu su empleadonan of nan representante sindical, con ta compensa esey.
Firmando e protocol antes menciona partidonan di forma mutuo a yega na un entendimento riba reduccion temporario di orario di trabao y mantencion di entrada. Di e forma ey cumpliendo cu tur legislacion laboral di nos isla.
FTA kier a gradici tanto e empresa pa su comprension y cooperacion den e situacion dificil cu Aruba y mundo henter ta pasando aden, como tambe na nan miembronan laborando na Hilton cu a pone nan confianza den e organisacion sindical aki pa representa nan den nan asuntonan laboral.
