E Parlamentonan di Reino, Curaçao, Sint Maarten, Aruba y Hulanda a yega na un acuerdo di ultimo momento encuanto e areglo di disputa cu tabata pendiente di aña 2010 caba. Di banda di e paisnan den Caribe, nan mester a entrega den e sentido cu no lo tin mas un veredicto cu ta imperativo den tur caso, pero di otro banda lo bin un seccion nobo den Raad van State pa disputa na nivel di Reino.
Un amienda entrega pa Presidente di Staten di Aruba mr. Ady Thijsen cu a propone esaki lo por conta cu un mayoria suficiente. Di banda di Secretario di Estado Raymond Knops tabatin bastante resistencia contra esaki, ademas cu el a haya cu lo mester consulta cu Raad van State ainda, motibo pa pidi pa pospone e votacion riba e proyecto di ley di Reino aki.
A bin dilanti diferente amienda formula durante e dos dianan di debate den Tweede Kamer, entre otro tambe cambionan den articulo 8 di e ley, pa acomoda e preocupacion di Secretario di Estado Knops pa loke ta e situacionnan di emergencia grandi cu ta rekeri cu gobierno di Reino mester por tuma accion inmediato, sin cu proceso di apelacion ta mara man di gobierno. Sin embargo, no tabatin claridad tocante e casonan specifico den cual gobierno di Reino lo por desvia di e conseho di e camara special pa disputa di Raad van State.
E votacion den Tweede Kamer cu tabata programa pa mas o menos 02:00 or di marduga na Hulanda. Si e ley no a pasa awe marduga, lo no tabatin espacio mas ya cu Tweede Kamer ta cuminsa su reces awe. E ley lo a haya un retraso nobo, cu tratamento bayendo fin di aña pa mas tempran.
