Ayera mainta durante conferencia di prensa di Gobierno, un acuerdo di un proyecto di digitalisacion den enseñansa a keda firma. Na mesa por a mira prome minister, minister di Enseñansa, Ciencia y Desaroyo Sostenibel, minister di Transporte, Comunicacion y Sector Primario y director di Setar. E acuerdo aki ta encera cu tur scol cuminsando di kleuterschool lo haya wifi gratis. Den e acuerdo ta poni cu den un periodo di 9 luna e trabaonan aki lo mester ta cla na tur e scolnan rond Aruba.

Minister di Enseñansa Armando Lampe (RED) a duna di conoce cu un di e clavenan importante den e Plan Nacional den Enseñansa di 2018 pa 2028 ta digitalisacion. Wifi ta hunga un rol hopi grandi akinan.

mandatario e comenta cu entre otro reconocimentonan di logro cu a wordo otorga na esnan den enseñansa recientemente, a otorga tambe un reconocimento na un proyecto di digitalisacion di un maestra di scol Washington. Den un presentacion cu e minister a haya di un les uzando wifi, a keda demostra cu e muchanan tabata mucho mas interactivo den e les. Ta hopi fundamental e ora pa tin Wifi cu suficiente velocidad na tur scol pa despues sigui traha pa pronto tur les wordo duna na un manera interactivo y digital, segun ministerio di Enseñansa.

Minister Lampe ta bisa cu despues di e plan di 10 aña na aña 2028, e meta ta pa no tin bukinan imprimi ni fotocopia mas. Pero henter e enseñansa lo wordo digitalisa. Esaki kiermen tambe cu lo bin personalisacion den enseñansa. Cada mucha na un manera personalisa lo ta activo den enseñansa danki na e tecnologia digital na unda cu cada un lo wordo diferencia segun su desaroyo, talento y capacidad. E mandatario ta bisa cu digitalisacion lo bay tin un efecto profundo y positivo na unda cu e lesnan lo bira mas interactivo. “Esaki kiermen cu e mucha lo haya mas stimulacion pa bira mas activo y nan lo bira ciudadanonan mas critico y participativo.”

Wifi pa 54 scol
Minister Armando Lampe a gradici director di Setar, Roland Croes y su comision cu e acuero. “Setar a bay un extra mile anto nos ta aprecia esey. Pasobra e suma cu tabata tin destina no tabata suficiente pa cubri tur scol. E ora Setar a duna un donacion di nan banda como tambe descuento na e servicio pa asina yega na e acuerdo aki cu tur scol lo haya Wifi cu suficiente velocidad,” minister Lampe a bisa.

Director di Setar ta bisa cu e trabaonan lo mester wordo haci despues cu scolnan cera, y tin un cantidad 54 scol pa ehecuta e proyecto aki. “Nos ta calcula cu prome cu 9 luna, purbando prome cu e siguiente aña escolar habri (2018-2019) cu tur scol tin Wifi. Nos plan ta pa caba cu ne prome cu 9 luna dependiendo con nos por yega na e scolnan.” Den e contract ta poni cu den un periodo di 9 luna e trabaonan aki lo mester ta cla na tur e scolnan rond Aruba. Director di Setar ta bisa cu e detaye con cada scol lo bay regla e asunto di conexion y si esaki lo keda cendi despues di scol tambe. Tin e posibilidad pa pone timer pa stop e atardi por ehempel. “Den practica nos lo bay wak con esaki lo bay bira. Pero tin scol ta cera esaki of habri e automaticamente. “