Dialuna anochi a keda firma un memorandum of understanding (MoU), entre director di Stichting Rancho, sr. Clifford Rosa  y Gobernador nobo di Guajira, sr. Wilmer Gonzalez Brito.

Bon Dia Aruba a haya acceso na un declaracion di Gonzalez Brito kende a cualifica e acuerdo aki como uno historico cu lo yuda fortalece e lasonan cultural y comercial entre Guajira y Aruba. E mandatario a laga sa cu esaki ta un aspiracion di hopi aña di Guajira.

Sr. Rosa como presidente di fundacion Rancho a firma e acuerdo aki den cuadro di e contenido di e acuerdo  DCA 338/16.  Ex minister di Cultura Otmar Oduber a firma e ultimo aki riba dia 26 di juli 2016, caminda nan a cumbini pa reactiva e convenio di acuerdo di intercambio cultural. Pero tambe riba tereno comercial y maritimo entre Aruba y Guajira. Dia 1 october 2014, fundacion Rancho a acerca DCA (Departamento di Cultura Aruba) cu e peticion pa sondea e posibilidad pa reactiva e acuerdo di intercambio  entre ambos region; y esaki a keda honra cu e acuerdo DCA 338/16.

Acusacion contra Gobernador di Guajira
Sinembargo informacion divulga pa prensa Colombiano ta indica cu Ministerio Publico di Colombia ta presenta awe un acusacion contra Gonzalez Brito relaciona cu supuesto iregularidad den e proceso electoral riba e forma con el a keda eligi como gobernador. Ta un caso totalmente diferente na esun di ex gobernador Kico Gomez kende a wordo involucra den caso criminal pisa.

Ministerio Publico di Colombia a indica cu ta acusa Gonzalez Brito como posibel responsabel di e delito di corupcion, ya sea di duna of ofrece algo pa e ciudadano vota p’e. E mandatario a yega di expresa na prensa di su pais cu e ta trankil cu e anuncio cu Ministerio Publico a haci contra dje. Di otro banda, Bon Dia Aruba a tuma contacto cu Clifford Rosa di fundacion Rancho kende actualmente ta na Colombia. E ta laga sa cu nan a firma e acuerdo cu gobernador di Guajira dialuna ultimo; pero kico pasa despues di e dia ey, no lo afecta locual nan a firma caba. Tambe el aclaria cu e acuerdo no lo mara e gobiernonan den nada. “Pues pa gobierno di Aruba no tin problema si pasa algo cu e gobernador aki.”

 Acuerdo
E importancia cu Gonzalez Brito ta haya cu e acuerdo ta habri e posibilidad di fortalece e intercambio cu Aruba. Nan deseo ta esun di Guajira lo por bira un suministrado di productonan agricola pa nos isla. “E posibilidad cu nos por exporta nos productonan principalmente esun di agricultura pa e islanan di Caribe y dicon no, pa Europa tambe probechando e relacion  cu tin e islanan aki cu e paisnan Europeo.” El a laga sa cu e alcance di e acuerdo aki tambe tin di haber cu intercambio riba tereno turistico cu ta un sector cu su gobierno kier traha duro riba dje. Nan intencion ta cu e sector turistico lo por bira un pilar pa Guajira su economia.

Tambe el a indica cu Guajira pa medio di e MoU aki lo por provee nos isla di material di construccion na bon prijs y bon calidad. Pero e ta haya cu finalmente loke ta mas importante die acuerdo ta reestablece e relacion comercial bilateral cu historicamente a yega di tuma luga entre Guajira y Aruba.

Awendia e  tin e posibilidad di no solamente haci uzo di e via maritimo; sino tambe via transporte aereo cu ta permiti cu e dos region aki lo por ta mas cerca entre nan mes como “pueblo ruman cu nos ta historicamente”.

Despues di e firma di e MoU aki, un delegacion oficial di Guajira lo tin plania di bishita Aruba, entre dia 20 y 24 di e luna aki.