“E compromiso cu nos tin cu esnan mas vulnerabel den nos comunidad cu tin limitacion fisico ta sigui. Di e forma aki, hunto cu colega minister Glenbert Croes ta percurando pa nan ricibi un cuido di calidad”, minister di Deporte, Salud y Turismo, Dangui Oduber a declara.
Segun e comunicado di gobierno aki, tabata 2 aña pasa cu un MOU a wordo firma entre e Ministerio di Salubridad Publico y Ministerio di Asuntonan Social. Diabierna esaki a bira un realidad caminda a traspasa e casnan di cuido di Stichting Algemene Bejaardenzorg Aruba (S.A.B.A.) pa Stichting Ambiente Feliz (S.A.F.).
Den un conferencia di prensa, Minister di Salubridad Publico Sr. Dangui Oduber y Minister di Asuntonan Social Sr. Glenbert Croes representa pa e organisacionnan di Departamento di Salud Publico (D.V.G.), Departamento di Asunto Social, Stichting Algemene Bejaardenzorg Aruba (S.A.B.A.), Stichting Ambiente Feliz, Stichting Verstandelijk Gehandicapten Aruba (S.V.G.A.) y CEDE Aruba a tuma luga firmamento di un acuerdo entre e dos Ministerionan y Stichting Ambiente Feliz cu e meta pa activa e centro di casnan di cuido pa personanan cu limitacion fisico y pa brinda nan cuido di calidad.
Desde cu Aruba a haya su Status Aparte te cu awor e personanan cu limitacion fisico mester a haya cuido na Corsou leu di nan famia, segun e comunicado. Cu e firmamento di e acuerdo aki, a crea e posibilidad pa duna e cuido necesario di 24 ora na nos grandinan y personanan cu limitacion fisico aki na Aruba mes. E proyecto aki ta conta cu e financiamento di fondonan di e Social Crisis Plan y ta bay cay bou encargo di Stichting Ambiente Feliz.
“Un biaha mas nos gobierno a demostra cu pa nos e hende ta conta, e ser humano ta central. Mi kier a gradici mi colega Glenbert Croes cu otro bunita proyecto pa nos comunidad. Ora bo ta traha cu curason grandi pa bo pais cosnan grandi ta wordo haci. Mi ta sumamente contento di por a contribui na un proyecto asina importante y bunita pa esnan cu mas mester di dje. Nos ta sigui cumpli”, e mandatario a termina bisando.
