WEB Aruba y DELL a negocia pa varios luna y finalmente ayera a firma e acuerdo a inicia e proyecto ICT Infrastructure & Data Center, cual ta forma parti di WEB su strategia ‘Aruba Renewable Energy Strategy’ (ARES). Esaki ta encera un red nobo y centralisa cual lo conecta tur sistema di control di e planta y aplicacionnan administrativo.
E acuerdo aki entre WEB Aruba y DELL ta consisti di varios parti. Parti tecnico, comercial y un parti legal pa formalisa e ehecucion di e proyecto den e proximo 8 pa 9 lunanan. Esaki ta pa ekipa WEB cu un sistema di network y server. Tur ekipo y software lo ta den un ‘Modular Data Center’. Tambe WEB lo tin un centralisacion completo di maneho di nan red.
Inversion di 9 miyon
E proyecto aki ta un inversion di casi 9 miyon florin. Cual ta necesario pa garantisa cu e compania ta capacita y prepara pa retonan den futuro riba tereno ICT.
Director di WEB Aruba Luis Oduber a bisa cu por medio di e sistema aki, e departamento di ICT di WEB lo por duna servicio mas efectivo y optimalisa su producto y servicio na comunidad. “Nos empleadonan lo tin mas herment cu lo yuda cada un eherce nan trabou eficientemente. Nan lo por uza tur e ekiponan aki, na cualke momento,pa haya acceso na tur aplicacion na un manera confiabel, directo y rapido.”
Esaki no ta e prome colaboracion entre WEB Aruba y DELL, na 2014 tambe nan a colabora riba cambionan den operacion cu WEB a realisa.
