Comparacion di salario y beneficionan entre sector priva y sector publico lo mester yuda reduci gasto di Gobierno

Lo compara salario y beneficionan di sector publico y semi publico cu esnan den sector priva y tuma decisionnan cu mester conduci na recortenan pa baha e gasto publico. Pero tambe lo mira si instancianan a ricibi subsidio na forma legitimo. Cada caso lo ta evalua a base individual, pero no ta exclui cu mester paga back. Eseynan ta algun di e aspectonan yamativo den e landspakket cu Aruba a caba di firma cu Hulanda.

Tur e medidanan ta pa controla y trece na orde e maneho y supervision financiero pa asina trece esaki bao un control debido.

Mester fortifica e columna financiero di Aruba

Basa riba investigacion existente of complementario lo determina con ta bay fortifica e columna financiero di Aruba. Aki ta enfoca particularmente riba e control financiero y di maneho, tanto na nivel central como na departamentonan publico, e funcion di auditoria y e posicion di Raad van Advies y Algemene Rekenkamer. Pa logra esaki mester adapta e cuadro huridico.

Locual kier logra ta modelonan y procesonan pa presupuesto y cuentanan anual, cu mester ta cla pa 31 di Januari 2022. Pa Februari 28, 2022 mester formalisa e modelo y procesonan aki, cu conseho di CAft. Ta trata aki di un tarea di Hulanda y Aruba, cu sosten di TWO (Tijdelijke Werkorganisatie cu ta adelanta COHO). E reportahe di investigacion con ta fortifica e organisacion financiero mester ta cla pa 31 di Januari 2022, cu tambe ta tarea di Hulanda y Aruba. Despues di esaki mester bin un consulta na nivel di Gobierno cu meta pa sigui e recomendacionnan riba cual a yega na un acuerdo. Locual ta keda pendiente ta investigacion con e uso di informacion estadistico ta traha pa formulacion di decision, y eventualmente lo determina hunto pa yega na un institucion di e Comision Nacional di Sistema Estadistica.

Evaluacion si instancianan a ricibi subsidio di forma legitimo

Na Januari proximo ta inicia un investigacion riba e maneho di subsidio, su ehecucion y si e relacionnan cu ta ricibi subsidio ta cumpli na legitimidad, efectividad y eficiencia. E investigacion mester ta cla pa 30 di Juni 2022, y esey lo determina si lo mester bin adaptacion na maneho of cu ta bin cobranza na institucionnan cu a ricibi subsidio di forma indebido, teniendo cuenta cu cuadronan legal y principionan di derecho. Hulanda y Aruba lo haci e trabao aki conhuntamente.

Tambe tin un investigacion tumando luga pa asina yega na un concepto di plan di accion cu mester keda cla dia 15 di Februari 2022, unda lo mester percura cu ta fortifica e funcion di compra di parti di Gobierno. E meta ta pa Gobierno cumpra servicio y producto di forma mas eficiente y efectivo posibel, y aki ta pensa riba un sistema central di compra. Hulanda y Aruba lo determina con lo implementa esaki unabes cu e plan ta aproba.

Costo efectividad di sector publico

Meta di e landspakket ta pa hisa eficiencia di sector publico pa medio di baha e gasto di salario na 10 porciento di Producto Bruto Interno y baha gasto publico en general. Ademas, mester hisa calidad y efectividad, incluso e poder di ehecucion di sector publico.

Aruba ta keda responsabel pa continuidad di procesonan vital, manera awa, coriente, internet, aviacion y otro.

Pero pa 15 di Januari 2022 lo finalisa e destaho publico pa revision di tur compania publico y semi publico, ademas di entidadnan di Gobierno. E revision, bao encargo di Hulanda y Aruba lo cuminza asina cu caba cu e trayecto aki. Meta ta pa yega na un revision integral di tur compania publico pa determina si berdad nan mester ta propiedad publico, pues si nan ta sirbi meta y interes publico. Mas ainda, lo kier sa si nan ta efectivo y eficiente. E investigacion lo produci proposicionnan cu despues mester keda implementa pa mehora e funcionamento.

Pa loke ta aviacion, a base di analisis lo mira si por traha na un fortificacion di e sistema di aviacion den cuadro di Reino, riba tereno di colaboracion cu organisacionnan internacional y tambe establece procesonan uniforme, conforme exigencianan di siguridad internacional, dirigi riba eficiencia y reduccion di costo. E base ta e palabracionnan haci den e grupo di trabao Aviacion. Te ainda no a haci ningun palabracion separa den e agenda di ehecucion.

Organisacion publico.

Pa 29 di Juni 2022 mester tin un asina yama ‘roadmap’ den concepto cla pa mehora e calidad, efectividad y eficiencia di organisacion publico, esta Gobierno, incluyendo e Ministerionan. E preparacion na nivel di ambtenaar pa e trabaonan mester ta cla pa 28 di Februari venidero unda ta organisa sesionnan na nivel administrativo pa yega na e trayecto di mehoracion aki. E sesionnan a cuminza e luna aki, pero lo continua na Januari y Februari 2022.

Condicionnan laboral di sector publico

Pa 1 di Februari 2022 lo tin un plan di investigacion cla, bao encargo di Hulanda y Aruba pa haci un investigacion comparativo riba condicionnan laboral primario, secundario y tercero unda ta compara condicionnan laboral entre sector publico y sector priva. Pa 1 di Maart lo determina e plan di accion pa e investigacion aki. E paso aki ta pa mira con pa desaroya y implementa recortenan den e condicionnan laboral, incluso salario y beneficionan den sector publico y semi publico. Esaki ta inclui overtime, areglo di vakantie, compensacion di biahe (pa trabao).

Aruba mester entrega un nota na COHO pa 15 di Januari con ta bay haci e investigacion riba e cuadro legal pa determina medidanan contra trahadonan publico cu a ricibi salario y beneficio di forma indebido, dependiendo nan situacion individual. Sea lo cobra parti di e salario of ta cuminza cu un trayecto di retiro. Esaki ta den cuadro di e meta pa yega na un funcionamento di personal optimal. Lo investiga e formacion, ocupacion y presencia real y capacidad di trahadonan di Gobierno y di organisacionnan publico. Pa 28 di Februari, Gobierno di Aruba mester tuma e decision riba e comienso di e proceso aki.

Pa 15 di Februari 2022, Hulanda y Aruba lo mester tin un rapport di e grupo piloto riba e investigacion di e funcion di Recurso Humano, cu mester conduci na mehoracion di e maneho, conseho riba e tereno di recurso humano y tambe administracion. Dia 31 di Maart, mester tin e concepto di conseho di maneho strategico di personal, unda ta tene cuenta cu e revision riba funcionamento y pago di salario y beneficio, y si esakinan ta hustifica. Meta ta pa limita influencia politico den asuntonan di personal den sector publico

Gasto di huur y digitalisacion

Ya a determina accionnan pa inventarisa e cantidad di edificio cu Gobierno ta huur, pa asina bin cu maneho dirigi na baha y controla e gasto aki. E obhetivo ta pa yega na un reduccion di 20 porciento, pero e concretisacion a keda posponi pa un siguiente agenda di ehecucion.

Finalmente pa yega na un sector publico eficiente, ya pa Januari 1, esta otro siman servicio y departamentonan cu tin prioridad mester ta conecta na un sistema digital. Particularmente ta pensa riba Direccion Infrastructura y Planificacion. Pa Februari 1, Direccion Asuntonan Economico, Comercio y Industria mester ta conecta, y pa Februari 15, lo mester tin informacion di e grupo encarga riba con e sistema ta funciona. Esaki ta den cuadro pa introduci digitalisacion den Gobierno y hisa su eficiencia y efectividad, y tambe baha gasto. E grupo encarga ta e asina yama Interoperability Pilot Team, cu ta cay por responsabilidad di Aruba mes.