Diasabra ultimo na Paris a logra cu 196 pais a yega na un acuerdo di decadanan di negociacion referiendo cambio di clima. Den e documento ta pone enfasis riba mantene e averahe di cambio di temperatura na mundo bou di 2 grado Celsius manera cu tawata e temperatura den e epoca pre industrial, hasta posiblemente bou di 1.5 grado C. Pa duna un splicacion cortico ariba e acuerdo di Paris, Departamento di Naturalesa y Medio Ambiente kier a elabora ariba e topico di cambio di clima y kico e acuerdo aki lo significa pa mundo.
E acuerdo ta den man awo di esnan cu ta formula leynan di e sistema hudicial di cada pais. E acuerdo di Paris ta un plataforma necesario pa sigura e soño di e futuro generacionnan cu ta sigui. E ta den man di gobernantenan di e paisnan rond mundo pa tene e cambio di clima bou di 2 grado Celsius pa asina sigura entre otro sobrevivencia of existencia di islanan, e asina yama Small Island Developing States (SIDS). E mensahe cu a manda afo ta uno fuerte pa e inversionistanan rond mundo. E direccion pa inversion ta den energia renoba y no inverti den fossiel fuel cu no lo ta un inversion ni beneficioso ni rendabel. Tecnologia cu ta pone nos mas cerca di 100% duradero lo ta e caminda pa sigui.
Con e acuerdo lo yuda? E acuerdo aki ta duna e hermentnan necesario pa atende e problematica di cambio di clima pa asina reduci escape di gas cu ta retene calor y tambe adapta pa e impactonan di cambio di clima. E prueba di dedicacion y accion lo ta na momento di implementacion di e acuerdo. Kico lo pasa si paisnan NO cumpli? Indudablemente, si paisnan no cumpli lo tin hopi reaccionnan negativo door di e otro paisnan cu a firma, mercadonan financiero lo tin dudanan pero mas ainda e perdemento di confiansa di e mesun hendenan di e pais. Aruba como parti di Reino Hulandes y consecuentemente Reino como miembro di Union Europeo a firma caba prome cu e conferencia na Paris e “Intended Nationally Determined Contribution” cu ta indica e grado di compromiso den e proceso di e acuerdo. Dicon tin urgencia pa haci algo referiendo na e fenomeno aki? (cambio den temperatura di e clima) E mundo su temperatura a yega di cambia pero no den e forma asina acelera. Por ehempel e cambio den e region Artico e ultimo 6 añanan ta alarmante y di preocupacion. Na Aruba tambe nos ta registra temperatura mas halto cu antes. DNM ta elogia y ta duna su contribucion y dedicacion pa accion den e acuerdo haci na Paris.
