(AP) — E grupo di 20 economia top na mundo a agrega Union Africano como miembro na nan cumbre anual riba diasabra, y e anfitrion, India a logra pa e grupo firma un declaracion final, pero solamente despues di suavisa e lenguahe tocante e asunto contencioso di e guera Ruso na Ucrania.
Den e lunanan conduciendo na e cumbre di lidernan na New Delhi, India no por a logra haya acuerdo riba e palabranan tocante Ucrania, cu Rusia y China en contra hasta di lenguahe cu cual nan tabata di acuerdo aña pasa na e cumbre G20 na Bali.
E declaracion final, publica un dia prome cu e clausura formal di e cumbre, a resalta e “sufrimento humano y impacto negativo agrega di e guera na Ucrania,” pero no a menciona e invasion Ruso.
Hopi hende tabata duda cu lo tin un comunicado final, cu lo tabata e prome biaha cu no tabata publica uno, y lo bira un golpi contra e prestigio di e G20.
Delegacionnan occidental a aplaudi e acuerdo, cu canciyer Aleman, Olaf Scholz yamando esaki un “exito di diplomacia Indio.” El a bisa reporteronan cu ta significante cu na final Rusia a “stop su resistencia” y a firma e acuerdo cu ta menciona e soberania y integridad teritorial di Ucrania.
En contraste, tabatin sosten amplio pa agrega e Union Africano (UA) na G20, haciendo esaki e di dos bloc regional pa bira un miembro permanente despues di UE, y agregando momentum na e empuhe di prome minister Indio, Narendra Modi pa duna mas voz na e Sur Global.
E continente tabata den spotlight tambe pa e teremoto na Maroco, cu a tuma lugar mientras mayoria di e delegadonan reuni na New Delhi tabata na soño. Modi a ofrece condolencia y sosten den su comentarionan di apertura.
Modi a adresa e delegadonan tras di un plakkaat cu tabata mustra su pais no como India sino como “Bharat,” un nomber antiguo Sanskrit stima pa su sostenedornan nacionalista Hindu.
E cumbre a yega apenas algun dia despues cu presidente Ruso, Vladimir Putin a bisa cu un acuerdo negocia pa ONU y Turkia permitiendo Ucrania exporta grano di forma sigur door di Lama Preto no ta bay keda restaura te cu nacionnan occidental cumpli cu su exigencianan pa cu exportacionnan agricultural di Rusia.
G20 a urgi pa reanuda e cargamentonan di grano, cuminda y fertilisante for di Rusia y Ucrania, bisando cu tabata necesario pa alimenta hende na Africa y otro partinan di mundo den desaroyo.
E G20 ta inclui Argentina, Australia, Brazil, Canada, China, Francia, Alemania, India, Indonesia, Italia, Hapon, Sur Korea, Mexico, Rusia, Saudi Arabia, Sur Africa, Turkia, Reino Uni, Merca y Union Europeo. Spaña tin un asiento permanente como invitado.
Putin y lider Chines, Xi Jinping a opta pa no atende e aña aki, sigurando cu no tabatin confrontamentonna dificil en persona cu nan contrapartinan Mericano y Europeo.
