Cu un preta di man entre Presidente di Fundacion Rancho, Clifford Rosa y Director di Fundacion Parke Nacional Arikok, Roland de Cuba a cera un acuerdo di cabayero.
E acuerdo aki ta encera cu Parke Nacional Aruba ta facilita tres di nan rangernan cu ta realisa trabou di mantencion pa yuda durante e trabou di renobacion di e forno di calki, cu ta tumando luga actualmente den pleno curason di Rancho.
De Cuba a cualifica esaki como un win-win, ya cu di nan banda nan ta yuda pa e monumento aki por wordo restaura. Pero di otro banda nan trahadonan ta adkiri conocemento y habilidad pa traha den e ofishi di metsla di calki. E ta un forma pa nan por haci uzo di nan conocemento pa restaura algun construccion den e area di Spaans Lagoen y otro ruinanan cu tin den teritorio di Parke Nacional Arikok. Pero tambe pa Rancho, pa asina mehora e condicion di e bario.
De Cuba a dicidi di bin cu e iniciativa aki, ora cu el a lesa un bon mensahe den Rancho cu ta bisa: “Stima bo mes, stima bo bario y stima bo medio ambiente.” Esaki ta e sentimento cu como parke nan ta hiba cu e proyecto aki. E ta spera cu otro instancianan y personanan, specialmente e habitantenan di e bario, por sinti e mesun sentimento aki.
Ademas, e tipo di proyecto aki ta pas cu nan vision cu tin di haci cu conserva di naturalesa, pero tambe nos patrimonio cultural. Igualmente e hecho cu nan a cera e tipo di colaboracion aki entre ambos fundacion, De Cuba ta mir’e como un bon futuro, unda un por yuda otro pa traha hunto na bienestar di nos naturalesa y proteccion di nos parti cultural.
Di banda di Fundacion Rancho, Clifford Rosa a declara cu tur monumento cu tin den Rancho poco poco ta hayando nan debido atencion, specialmente for di e instancia cu a pone e proteccion ariba nan.
E ta kere cu pronto lo anuncia e proximo paso cu lo sosode cu e Tanki di Awa, cu tambe ta un monumento industrial protegi. E forno di calki ta den man di Stichting Monumenten Fonds Aruba (SMFA), pero pa mantene e beyesa den e area, fundacion Rancho ta pidi atencion pa e cas cu ta banda di e monumento di e forno.
Igualmente, Rosa a bisa cu e hanchi di calki tin otro manera cu lo wordo atende cune. E ta haya positivo cu e trabou di renobacion di e forno ta treciendo un ambiente positivo den e bario aki. Den e ultimo tres siman nan no ta wak presencia di e adicto ambulante den e area aki, ya cu e ambulantenan mes ta compronde e proceso aki. Rosa ta haya cu e turistanan cu ta bin bishita e bario aki, ya sea nan ta bin pa bishita e monumento of ta bin pa join nan mes cu locual e caya patras di boulevard ta ofrece.
