E acuerdo firma ayera na Hulanda entre gobierno di Hulanda y gobierno di e tres islanan autonomo, ta significa cu definitivamente no tin un ley di Reino pa institui un organismo COHO, bao di articulo 38, inciso 2 di Statuut, cu lo a bay dirigi e reformanan acorda, cu te awor a keda estableci den e respectivo landspakketnan pa cada isla. Na su lugar ta bin e acuerdo mutuo entre e islanan y Hulanda, a base di mesun articulo 38, inciso 1 di Statuut.

Loke no a cambia ta e meta di e areglo: ehecucion di reforma den e sectornan publico di e Paisnan (isla) pa por aumenta e resiliencia economico y e forza ehecutivo gubernamental na e islanan. E texto ta bisa cu e reformanan ta tuma lugar na un manera responsable, teniendo cuenta cu circunstancianan socio-economico y e capacidad di cada un di e paisnan.

Landspakket

E acuerdonan entre Hulanda y e islanan encuanto e reformanan ta keda describi den e respectivo Landspakketnan. Tin posibilidad di haci cambio den e pakket, si gobierno di Hulanda y e isla concerni ta di acuerdo cu mester haci cambio. Esaki no ta tuma lugar sin antes duna e parlamento di e isla concerni e oportunidad durante 10 dia pa tuma nota di e cambio proponi y informa nan ministro di asunto general di nan deseo of obhecion encuanto e cambio.

Coordinacion pa ehecucion di e landspakketnan ta resorta bao di e ministro di asunto general di e respectivo paisnan. Pa esey cada un lo tin un ‘Uitvoeringsorganisatie’ (Organizacion Ehecutivo). E colaboradornan lo ta nombra pa e ministro encarga cu asunto general, cu ta stipula tambe con e organizacion lo opera bao di su guia.

Pa implementa e landspakketnan tin un cooperacion entre e islanan y Hulanda y e coordinacion na Hulanda ta resorta bao di e ministro encarga cu asunto interno y relacion di Reino. Pa esey lo tin un ‘Werkorganisatie’ pa apoya e ministro den su tarea. E uitvoeringsorganisatienan y e Werkorganisatie tin e tarea pa conhuntamente apoya, guia y monitor ehecucion di reformanan relaciona cu topiconan describi den e Landspakket. E topiconan ta poni den forma mas detaya den un ‘uitvoeringsagenda’ y si ta relevante, den un plan di ehecucion.

Forma di Coopera

E organizacion ehecutivo na e islanan y e Werkorganisatie Hulandes ta ehecuta nan tareanan den consulta cu otro. E ministronan ta stipula un reglamento cu regla encuanto e forma di traha hunto di e ministronan y e organizacion ehecutivo di un pais y e Werkorganisatie Hulandes. E reglamentonan a keda añadi como anexo na e areglo mutuo firma ayera. Den e proximo dianan lo sigui mas informacion tocante nan contenido. Tin e posibilidad di haci cambio den un reglamento si e ministronan yega na un acuerdo tocante esey. E islanan y Hulanda ta suministra na otro, tumando na cuenta e obligacionnan legal di mantene secreto y otro obligacion legal cu por ta conta na un pais, tur informacion cu ta razonablemente necesario pa ehecucion di e tareanan.

E Organizacion ehecutivo y e Werkorganisatie ta traha, pa realizacion di e landspakket, cada seis luna un propuesta pa un ‘uitvoeringsagenda’ cu ta bay pa e ministronan, cu ta aproba esaki. E palabracionnan encuanto resultado den un uitvoeringsagenda ta forma e base riba cual ta evalua avance. E uitvoeringsagenda ta contene e proyecto, programa y medidanan di reforma cu ta prepara o ehecuta den e periodo concerni, cu mencion di resultado cu mester tin y e periodonan pertinente. Ta señala cu e uitvoeringsagenda ta tene cuenta cu factibilidad di ehecucion y e circunstancianan specifico di e isla concerni. Despues di termina e uitvoeringsagenda, cu acuerdo di ambos banda, esaki ta bay pa e parlamento di e paisnan concerni.

Caso di diferencia di opinion

Den caso cu e organizacion ehecutivo di e isla y e Werkorganisatie no por yega na acuerdo encuanto e propuesta pa e uitvoeringsagenda, e ministronan concerni ta bay den consulta mas pronto posible pa yega na un acuerdo. Si tal consulta no conduci na acuerdo dentro di tres siman, nan ta inicia un trayecto di mediacion segun e procedimento describi den articulo 8. Den e articulo aki ta describi e casonan specifico den cual no ta yega na acuerdo, y e ministronan ta nombra dentro di dos siman despues di termina e consulta entre nan, un mediador independiente, pa trata di yega ainda na un acuerdo. E mediador ta bin cu un propuesta dentro di cuatro siman pa yega na tal acuerdo. Si e ministronan dicidi di no sigui e propuesta di e mediador, e mediador ta traha un relato cu e conclusionnan di e mediacion, cu mencion di e puntonan divergente. Pa garantiza e posicion independiente di e mediador e persona aki no por tin un puesto politico, ni relacion directo manera esposo o pariente di un ministro, secretario di estado, o parlamentario. Si e ministronan dentro di dos siman no por yega na un acuerdo encuanto nombramento di e mediador, ta pidi presidente di Corte Comun di e Islanan pa haci un propuesta, cu e ministronan lo (mester) sigui.

Financiamento

Ministro di asunto interno y relacionnan di Reino ta pone recurso disponible pa apoya ehecucion di e landspakketnan. E recursonan aki ta pa financia proyecto, programa o medida di reforma y pa cubri gasto di experticio y capacidad di ehecucion. Den su carta na Tweede Kamer encuanto e areglo mutuo, secretario di estado van Huffelen a menciona un suma di 30 miyon euro anual te cu 2027 disponible, di cual mas o menos 6,5 miyon euro lo bay pa gasto di aparato Hulandes; e resto ta pa cubri gasto di e ehecucion di e Landspakketnan.