Despues di casi un luna di contratiempo, posponiendo varios biaha e firmamento di un acuerdo, gobierno di Aruba y Valero a yega nan meta: ayera den presencia di casi henter e gabinete y fraccion di AVP, e partidonan a firma e deal unda Valero ta traspasa e refineria y terenonan pa gobierno.
E biaha aki e traspaso ta pa asina gobierno lo por lease e refineria pa Citgo y tambe ta esun encarga cu e benta y marketing di e producto riba mercado local. Asina gobierno como doño di e companianan estatal ta bay haya entrada directo. Pero esaki oficialmente ainda no ta regla. E leynan necesario ainda ta na Raad van Advies pa duna su conseho y despues lo bay parlamento. Pues cu e acuerdonan firma cu Citgo y awor cu Valero e apertura di e refineria ainda no ta finalisa, tanten parlamento no a aproba e leynan.
Sinembargo gobierno y tambe e companianan Citgpo y Valero ta mustra tur confiansa cu esaki lo no bay ta un problema. Y mester menciona cu e parlamento den un mocion aproba unanimo un poco tempo pasa ya a urgi gobierno pa haci tur locual ta posibel pa habri e refineria bek. E partidonan awor a pone un fecha nobo di 1 di october pe reaperura y riba 7 di october tin un fiesta grandi planea caba den Carnival Village.
E traspaso di e refineria y terenonan ta bay hunto cu un suma di mas o menos 60 miyon florin cu Valero mester paga. 20 miyon ta pa e fondo di limpiesa cu mester financia e limpiesa di e luga den futuro momento cu lo desmantela e refineria. Citgo lo maneha e fondo aki y tambe mester contribui.
Bon Dia Aruba a puntra Martin Parrish, e vice president ‘alternative fuels’ di Valero (tambe a traha na Citgo) cu a firma e acuerdo, con ta para cu e sushi cu su compania a dump riba e tereno di e refineria durante e añanan cu nan a opera e planta. Specificamente e dump di asbest na 2006 den cercania di Fort Heuvelstraat unda tin habitantenan preocupa pa nan salud pero tambe balor di nan casnan. “E refineria awor ta den miho condicion cu e tabata ora nos a tum’e over. Pero nos ta un compania responsabel y lo solucion’e.”
Nos a puntra si Valero ta keda responsabel pa cualkier daño of awor tambe a traspasa e responsabilidad pa gobierno di Aruba. Pero Parrish no kier a contesta y a referi na gobierno. Minister di Energia, tambe encarga cu Medio Ambiente, Mike de Meza e ora ta bisa cu Valero lo deshaci di tur asbestos segun ‘standaard nan internacional di bon practica’ y ‘riba manera responsabel cu mester tuma luga’. “Esaki a wordo discuti cu gobierno y nos lo percura cu esaki lo wordo cumpli.”
Ora Bon Dia a puntra mas claridad kende e ora ta responsabel pa cualkier daño pa salud di esunnan cu ta biba cerca di e dump, minister De Meza ta comenta cu no ta bon pa haci ‘speculacionnan sin cu tin prueba y pa busca esun culpabel. Trece esaki dilanti den e forma aki, mi ta kera ta algo iresponsabel tambe.”
Un poco tempo pasa Bon Dia Aruba a trece e noticia cu un famia na Fort Heuvelstraat a manda diferente carta pa Valero unda ta pone e compania Mericano responsabel pa cualkier daño di e dump di asbest na 2006. E famia De Vries hunto cu un otro famia biba na e mesun caya tambe ta pidi pa gobierno haci un investigacion (chekeo medico) pa controla si nan ta afecta of no. Banda di esaki nan kier compensacion den e caso e asbest ta keda dera eynan, pasobra esaki ta afecta e balor di nan cas.
