Den rueda di prensa despues di reunion di Conseho di Ministro di Reino diabierna pasa, sercretario di estado Alexandra van Huffelen a anuncia cu el a yega na un acuerdo cu gobierno di Aruba encuanto e cambionan cu mester haci den e ley di Aruba di supervision financiero (LAft). E cambionan aki mester ta aproba y na vigor entrante 1 di januari 2024. Loke a keda pendiente ainda ta un acuerdo tocante un ley di supervision financiero (RAft), pa cual lo continua e discusion entre e dos gobiernonan.
E cambionan cu Hulanda a propone pa hinca den e ley di Aruba, pa entrante otro aña en todo caso tin un supervision financiero vigente pa Aruba, mientras ta sigui papia tocante e ley di Reino, ta abarca tres punto. Ta trata, segun gobierno di Aruba, di informacion financiero mas detaya cu mester aparece den presupuesto. Tambe di e inclusion di e norma nobo pa gasto di personal den presupuesto gubernamental na Aruba, cu lo ta e 10% di Producto Interno Bruto (PIB; GDP). Relaciona cu esaki Hulanda tabata desea tambe yega na un definicion di e gastonan di personal, describiendo e categorianan cu mester bay aden.
Den e proyecto di ley di Reino, cu Aruba no a acepta, a defini e lista amplio di gasto cu Hulanda ta desea di mira inclui. E tercer punto tabata e deseo di no implementa mas proyecto ‘PPP’. Gobierno di Aruba a expresa otro opinion tocante e ultimo punto aki, mirando necesidad di cierto inversion grandi cu lo mester haci den futuro cercano. No ta conoci na cual acuerdo a yega encuanto esaki.
Den e proximo simannan e propuesta di cambio di ley lo mester bay pa Raad van Advies (RvA), pa despues keda trata den parlamento den luna di december.
Continuacion di negociacion encuanto ley di Reino
Gobierno demisionario di Hulanda tin un mandato pa sigui negocia cu gobierno di Aruba tocante introduccion di un ley di Reino pa supervision financiero, pa cual no tin un fecha limite determina. Tanten no tin un acuerdo, Aruba lo mester paga un interes di 6,9% riba e prestamonan di 2020. Esaki por bira 5,1% na momento cu tin un acuerdo encuanto e forma y contenido di un ley di Reino. Na momento cu tin un ley di Reino vigente, Aruba lo por haya un interes di 3,2%. Gobierno Hulandes a expresa disposicion pa considera e modelo ‘hibrido’ cu Aruba a propone. E modelo ta encera un propuesta di reparti aspectonan di supervision financiero entre un ley di Aruba y un ley di Reino.
No tin detaye conoci con e reparticion lo por ta. Tampoco tin indicacion cu e negociacion ta avanzando. Despues di un acuerdo ainda por dura bastante tempo pa un ley di Reino haci e recorido legal necesario y te e tempo ey Aruba lo no mira e porcentahe mas faborable bira realidad.
Potretnan ta di archivo.
