Acuerdo amplio entre Aruba y Guajira a bira formal

E acuerdo entre Aruba y Guajira (Colombia) riba tereno di cultura y sector primario a bira formal. E anuncio aki a wordo haci oficialmente den cuadro di inauguracion di Stichting Rancho su centro di actividad.

E ta un acuerdo cu na 2009 a bin cu ne; pero tabatin algun inconveniente. Pero aworaki el a keda reactiva como un continuacion di e proyecto inicial.

Presidente di e fundacion aki, Cliffort Rosa ta laga sa cu oficialmente gobierno di Aruba pa medio di e ministerio di Cultura a aproba e acuerdo aki cu ta uno amplio. Awor nan mester duna bida na e acuerdo aki pa medio di e intercambionan entre e dos parti aki den e areanan menciona riba e convenio aki.

Sr. Rosa ta bisa cu e no ta un acuerdo bilateral riba cultura so; sino cu Aruba y e region di Guajira na Colombia ta haya oportunidad pa estrecha nan laso den agricultura, cria y pesca. Tambe e parti comercial cu tanto Aruba como Guajira a conoce pa basta aña ta wordo reactiva pa medio di e acuerdo aki. Nan ta bay trece di un forma cu fundacion Rancho tambe lo ta envolvi den esey.

E dimension di e acuerdo aki ta uno grandi te hasta prometedor. E ta un intercambio cultural y academico tambe caminda hendenan experto di Guajira lo bin duna charla na Aruba; y tambe nos expertonan lo duna charla na Guajira na nivel di universidad tambe.  Tambe riba sector primario, pero tin mucho mas puntonan cu a wordo acorda tambe riba aspecto social di integracion di nos pueblonan.

Acuerdo su contenido

E siguiente areanan a wordo identifica pa implementa e acuerdo bilateral aki, entre nan: E creacion di encuentronan cultural. Desaroyo di pasantia, becanan riba tereno di investigacion social, concursonan, publicacionnan y principalmente pa fortalece e vinculonan di hermandad pa medio di oferta di e turismo cultural entre e dos pueblo aki; tambe intercambio riba tereno maritimo. Igualmente a keda estableci investigacion di historia di e relacion social y historico entre ambos region pa documenta esaki.

Ademas e acuerdo aki tin di haber cu intercambio di carga, ya cu na Riohacha ta existi un interes enorme pa manda productonan pa Aruba. Pero aki na Aruba ta existi un gran interes di bin cu fruta y berdura for di Colombia, mirando e situacion actual di e bisiña pais di Venezuela. “Guajira ta un alternativa y oportunidad hopi bon pa Aruba; y tambe den su cercania cu e ta”, segun sr. Dabian.