Reportero di Bon Dia Aruba a cerca representante di Hospital pa asina puntra ariba un actualisacion di e caso di pap test cu a sucede algun tempo atras.
A puntra vocero di Hopsital, Charlaine Huntington kico a pasa cu e personanan cu a comete fraude y si e personanan aki a enfrenta algun tipo di consecuencia. Tambe a puntra si e hendenan cu mester a haci pap test cu no a haya resultado a wordo yama back pa haci pap test di nobo pa haya nan resultado.
Huntington a splica cu a disolve e contratonan laboral cu e personanan envolvi. Cu decision di corte dia 16 juli 2020 y respectivamente decision di corte di 28 mei 2020, e contratonan laboral cu e dos funcionarionan di laboratorio a wordo disolvi.
El a sigui splica cu den e caso civil cu laboratorio a cuminsa contra e dos funcionarionan, corte a sentencia un di e funcionarionan pa paga laboratorio un suma, mas interes legal. E suma aki ta consisti di e gastonan pa reevalua e testnan, uso di personal di laboratorio pa reevaluacion di e testnan, gastonan di personal pa e investigacion interno y otro gastonan relaciona cu e investigacion.
E demanda contra e otro funcionario a wordo rechasa door di corte. Laboratorio a apela den e caso aki y ainda e caso mester wordo trata door di corte di apelacion.
Pa loke ta e personanan cu mester a haci a pap test, el a indica cu pa mitiga cualkier duda encuanto e resultadonan di e paptestnan, e Hunta di Directiva di Hospital a duna instruccion na e departamento pa revisa tur resultado di paptest den e caso aki. A haci un comparacion cu e testnan revisa y e testnan original. Durante esaki a constata cu mayoria di e resultado tabata completamente igual.
“Hospital ta para semper pa un diagnosis sigur y completo pe pashent,” Huntington a enfatisa.
