Ayera e famoso actor di television Venezolano y un persona masha stima na Aruba, Raúl Amundaray a fayece na Houston, unda e tabata biba ultimo tempo.
Informacion divulga pa e corant Venezolano, El Universal a indica cu e autor di 82 aña y conoci como ‘galán de galanes’ a fayece di un atake di curason.
E laso di Raúl José Amundaray Castro, cual tabata e nomber berdadero di Raúl Amundaray, cu nos isla di Aruba ta data for di hopi aña pasa, ora cu el a casa cu un Arubiano, Omaira Habibe kende tabata yiu di un comerciante doño di Tienda Habibe den caya grandi.
Amundaray Castro a nace na Caracas dia 18 di mei 1937. Amundaray tabata un persona polifacetico. Ademas di actor, e tabata locutor, declamado y maestro di actuacion na nivel profesional. Tambe el a funda e Teatro di Camara di Caracas.
Amundaray a hunga den diferente novela lagando un legado den historia di telenovela Venezolano. Un novela cu a laga un recuerdo inolvidabel na Aruba tabata “El derecho de nacer.” Na aña 1965, Raúl Amundaray a protagonisa e novela aki cu apenas 28 aña di edad, transmiti pa e canal RCTV (Radio Caracas Television).
Den cantidad di ocasion, el a yega di bishita na Aruba, unda actualmente e tin yiunan bibando akinan. Aña pasa Raúl Amundaray a bin Aruba, caminda el a bishita nos Tata di Cultura den feliz memoria, Padu Lampe, y tambe e cantante Venezolano, Victor Samuel “El Duque.”
