(AP) – Jonathan Majors su ex pareha a retira demanda di argesion y difamacion contra e actor di Hollywood despues di a yega un acuerdo.
Abogadonan di Majors y Grace Jabbari a acepta para e caso cu prehuicio, segun e documento conhunto entrega na corte diahuebs. Jabbari su abogado a bisa diabierna cu a yega “un acuerdo faboral” pero a nenga elabora riba esaki. “Grace Jabbari a exhibi curashi tremendo durante e proceso largo y dificil aki,” abogado Brittany Henderson a bisa den un declaracion. “Nos ta spera cu e por finalmente pone e capitulo aki un banda y sigui dilanti cu cabes na halto.”
Repreentantenan pa Majors no a responde na e-mail pidiendo comentario.
Jabbari, den su demanda entrega den maart, a acusa e homber di 35 aña y parti di elenco di Marvel y Creed III di incidentenan cu a keda escala den abuso fisico y verbal durante nan relacion, incluyendo agresion, difamacion y causa sufrimento emocional.
E bailarina Britanico a entrega e demanda lunanan despues cu Majors a keda condena di agresion y acoso en conexion cu un problema na Manhattan.
Durante un discusion cu a cuminsa patras di un vehiculo prome cu sigui riba caya, Jabbari ta acusa cu Majors a dal e na su cabes cu su man, a dobla su brasa tras di su lomba y a primi su dede te cu esaki a fractura. Di otro banda, Majors a acusa cu Jabbari tabata den medio di un episodio di jaloersheid y tabata e agresor, agregando cu e tabata solamente purbando di recupera su telefon y bay.
Despues di e veredicto di culpabel, Majors a keda inmediatamente despedi pa Marvel Studios, cual a contrata su persona pa interpreta Kang the Conqueror, un rol cu tabata pone su persona como e villano principal di e imperio di entretenimento su peliculanan y programanan di television pa varios aña.
Majors y Jabbari a conoce otro riba sitio di grabacion di 2021 su Ant-Man and the Wasp: Quantumania” den cual Majors a interpreta Kang y Jabbari tabata un coach di movecion. Majors poco poco a bolbe ser mira den e escena di Hollywood den simannan recien.
Su pelicula cu tin hopi tempo para, “Magazine Dreams” a keda adkiri pa lansamento teatrico luna pasa. E drama aki a cuminsa genera speculacion di un Oscar pa Majors, pero esaki a keda tira afo pa e distribuidornan despues di su condena december ultimo.
Den comienso di e luna aki, Majors y colega actor Meagan Good a anuncia nan compromiso na Ebony Power 100 Gala den Los Angeles.
