Irrfan Khan, un personahe veterano di pelicula di Bollywood, y un di e exportacionnan mas famoso di India na Hollywood, a fayece cu edad di 54 aña.
Khan a interpreta e inspector di polis den ‘Slumdog Millionaire’, y e ehecutivo di parke Masrani den ‘Jurassic World’ Tambe el a actua den ‘The Amazing Spider-Man’ y e fantasia di aventura, ‘Life of Pi’.
Khan a muri ayera despues di su admision den hospital Kokilaben Dhirubhai Ambani na Mumbai cu un infeccion di colon. “Irrfan tabata un alma fuerte, un persona cu a lucha te na final y semper a inspira tur persona cu a bin cerca di dje”, segun un declaracion di team di e actor.
Khan a debuta riba pantaya den e drama nomina pa premio di Academia na 1988, ‘Salaam Bombay!’, un storia di e muchanan riba caya di Mumbai. El a traha cu directornan Mira Nair, Wes Anderson y Ang Lee.
Khan na 2018 a wordo diagnostica cu cancer neuroendocrino inusual, y a ricibi lunanan di tratamento na Reino Uni. “Mi tin confiansa, mi tin resignacion”, el a skirbi den un nota di curason despues cu el a revela su bataya contra cancer.
Khan a gana un cantidad di premio di pelicula na India, incluyendo un Indian National Film Award na 2012 pa miho actor pa su prestacion den ‘Paan Singh Tomar’, un storia di un atleta shete biaha campeon nacional kende a retira di forsanan arma Indio pa goberna e ravine Chambal na India central
Khan a ricibi un Independent Spirit Award pa actor di sosten na 2006, pa e drama Indio-Americano ‘The Namesake’, y un premio viewer’s choice na festival di Cannes 2013 pa su rol den e drama romantico Indio, ‘The Lunchbod’. Khan tambe a aparece den ‘Haider’ inspira pa Hamlet, un film di Bollywood tocante Kashmir Himalayo militarisa.
Tributonan a yega for di Bollywood, incluyendo di actor Amitabh Bachchan, kende a bisa cu Khan tabata un ‘talento increibel’ y un ‘contribuyente prolifico na mundo di Cinema’. El a skirbi riba Twitter cu Khan a ‘laga nos mucho trempan’.
Prome minister Narendra Modi a tweet cu ‘fayecimento di Khan ta un perdida pa mundo di cinema y teatro’.
Den un entrevista cu AP na 2018, Khan a bisa: “Mi a mira bida for di un angulo completamente diferente. Bo ta sinta y mira e otro banda y esey ta fascinante. Mi ta riba un biahe.”
Ultimo pelicula di Bollywood di Khan, ‘Angrezi Medium’, un secuela na un di su hit mas grandi ‘Hindi Medium’ (2017) a wordo lansa prome cu India a bay den lockdown na maart pa motibo di e pandemia di coronavirus. Khan ta laga atras su esposa, escritor di television y productor Sutapa Sidkar, y su yiunan homber Babil y Ayan.
