(AP) — Angus Cloud, e actor cu tabata hunga e dealer di droga Fezco “Fez” O’Neill den e serie di HBO, “Euphoria”, a fayece. E tabatin 25 aña di edad.
Publicista di Cloud, Cait Bailey a bisa cu Cloud a fayece ayera na cas di su famia na Oakland, California. No a duna un causa di morto.
“Siman pasa el a dera su tata y a lucha intensamente cu e perdida aki,” e famia a bisa. “E unico consuelo cu nos tin ta pa sa cu Angus awo ta reuni cu su tata, kende tabata su miho amigo. Angus tabata habri tocante su bataya cu salud mental, y nos ta spera cu su fayecimento por ta un recordatorio na otronan cu nan no ta nan so y no mester bringa esaki nan so den silencio. Nos ta spera cu mundo por record’e pa su humor, hari y amor pa tur hende,” e famia a agrega.
Cloud no a actua prome cu “Euphoria.” E tabata canando riba caya na New York ora cu scout di casting Eleonor Hendricks a ripar’e. Cloud tabatin resistencia na comienso, sospechando cu tabata un scam. Despues director di casting, Jennifer Venditti a reuni cune y creador di e serie, Sam Levinson eventualmente a hacie un co-strea den e serie hunto cu Zendaya pa su prome dos temporada.
Pa algun, Cloud tabata parce asina natural como Fez cu nan a sospecha cu e tabata identico na e personahe – un nocion cu Cloud a rechasa. “E ta molestia mi ora hende ta bisa cu ‘mester ta asina facil! Bo por djis yega y ta bo mes.’ Ami ta manera, ‘pakico abo no ta bay hacie?’ E no ta asina facil,” Cloud a bisa Variety. “Mi a trece hopi na e personahe.”
E personahe a haci Cloud e strea emergente den un di e shownan cu mas a hala atencion riba television. E tabatin un rol di sosten den su prome pelicula, “The Line”, un drama di universidad cu Alex Wolff y John Malkovich cu a premier e aña aki na e Tribeca Festival. Recientemente, tambe a cast Cloud pa co-strea den “Scream 6.” E tambe a aparece den videonan musical pa Juice WRLD, Becky G y Karol G.
E tercer temporada di “Euphoria” ainda no a cuminsa filmacion.
