Actonan ilegal ambiental ta keda pasa sin cu gobierno of husticia ta actua

Siman pasa Citgo a admiti cu nan a causa un derame di azeta den lama. Despues a keda keto. Niun instancia di gobierno a actua den sentido cu nan a informa Ministerio Publico (OM) di locual a pasa.

Bon Dia Aruba a puntra OM si nan a ricibi un rapport di e inspectornan cu mester controla incidentenan manera derame. Sinembargo e vocero ta bisa cu nan no a wordo poni na haltura. Nan sa di e caso for di e publicacion den medionan di comunicacion. “Nos no por haci nada si nos no sa di nada”, asina e reaccion di e vocero ta.

Pero Bon Dia Aruba ta conoce e autorisacion di OM y nan por actua tambe riba nan mes. Ora di confronta e vocero cu esaki, el a puntra si nos a acerca instancianan gubernamental caba cu mester investiga casonan manera derame. Te awor nos no a logra di haya informacion, nos a indica tambe na OM. Un motibo tambe ta cu por ehempel Departamento di Medio Ambiente cu mester investiga actonan ilegal ambiental, no mag di papia mas cu prensa.

Nos a puntra OM e ora cu awor cu e derame Citgo a actua contra e ley (Hinderverordening) y kico e ora lo bay haci? Pues si nan ta laga e caso asina sin actua contra e compania aki. Algo cu ta sosode mas frecuente. Bon Dia Aruba a publica hopi biaha riba otro casonan unda gobierno ni husticia ta actua contra esunnan cu a comete e actonan ilegal aki. Por ehempel Serlimar cu ta paga sushi na candela riba e dump di Parkietenbos. Algo cu pa hopi aña ta causa molester pa e habitantenan di Simeon Antonio. Ni brandweer kier bin, asina habitantenan ta bisa ora nan ta yama pasobra dump ta na candela. No tur ora Serlimar ta responsabel pa e candelanan pero e compania mes a admiti cu nan ta kima sushi pasobra e dump a yen y asina ta creando espacio pa mas sushi.

Un otro caso ta e dump ilegal riba tereno di refineria, unda Valero a dump asbest ilegal pa despues riba ordo di Refineria di Aruba a dera esaki atrobe den un forma ilegal. E pareha bibando cerca ta den corte awor pa dos caso unda ta purba pa hues forsa gobierno y husticia pa actua contra e dump ilegal aki.

Banda di esaki tin un otro caso na e mesun luga unda WEB Aruba ta traha un parke solar riba tereno contamina. Nan no tin permiso ainda pa construccion pero ya a cuminsa cu e preparacion pa construccion. Habitantenan, entre otro un cu tin un crèche, ta keha di e stof cual segun e persona aki ta contamina. E persona aki ta bisa cu e mes a traha hopi aña den e refineria y na e luga unda e parke solar ta wordo construi, unda e mes a traha cu diferente material toxico .

Un otro caso cu ta envolvi WEB ta e derame cu nan a causa mas cu dos aña pasa. Departamento di Medio Ambiente a entrega rapport na OM unda ta mustra bon cla cu e compania ta culpabel di e contaminacion. Bon Dia Aruba ta puntrando mas cu 2 aña tambe na OM kico nan lo haci contra e compania. Pero ainda no a ricibi un contesta si nan a actua contra e planta.

Manera Bon Dia Aruba a trece caba, OM a bisa nos cu no tin suficiente ley ambiental pa nan por actua den mayoria di e casonan menciona. Sinembargo tin diferente ley, entre otro e Hinderverordening cu ta regla entre otro unda y ki sorto actividadnan ta posibel den cierto areanan. Por ehempel Citgo tin un permiso (Hindervergunning) cu ta prohibi e compania pa causa e derame manera a pasa siman pasa. Pues a base di esaki gobierno y husticia por cuminsa un investigacion. Pasobra preguntanan ta keda awor: esaki por pasa atrobe? Y Citgo awor a tuma medida pa preveni un otro derame. Esaki tambe ta importante como cu Aruba su pilar economico mas grandi ta turismo, y e turistanan entre otro ta bin pa nos lama.