E acto protocolario di e 121 aniversario di Filipinas a conta cu presencia di e prome mandatario di Aruba, Sra. Evelyn Wever-Croes, kende a expresa su mensahe di gradicimento na e comunidad Filipino pa nan aporte y contribucion den e desaroyo di nos pais.
E prome mandatario a declara na Bon Dia Aruba cu den cuadro di Dia di Filipinas e kier felicita na prome luga e comunidad aki cu a bandona nan famia, nan hogar y nan pais, y nan a bin leu pa establece na Aruba.
“Tin biaha nan mester biaha dos dia pa yega te akinan, pa yuda nos desaroya nos economia,” el a declara.
Wever-Croes a duna un pabien pa e dia importante di nan independencia. Un fecha caminda e simbolonan nacional di bo himno y bo bandera ta wordo honra. Pero tambe e cultura y e tradicion, y e ta haya cu esey e comunidad Filipino ta haci bon.
El a expresa su palabra di danki y alabes, e prome mandatario a pidi e comunidad aki pa sigui cu nos den e lucha cu pais ta pa enfrenta tur e retonan cu nos pais ta enfrentando. E ta sigur cu tur hende uni y hunto cu e comunidad Filipino, pais Aruba lo por vence tur e retonan aki.
Segun minister Rudy Lampe Aruba y Filipinas tin varios aspecto comun
Minister di Enseñansa, Ciencia y Desaroyo Sostenibel, Rudy Lampe a uni su mes na e palabranan di pabien na e comunidad di Filipinas ariba nan fecha di independencia.
“Realmente nos ta hopi agradecido pa tur loke e comunidad Filipino a duna na Aruba… Pueblo Arubiano, nos mester aprecia e migrantenan cu ta bin traha y contribui na nos pais,” Lampe a bisa.
El a haci un breve referencia historico, caminda na aña 1898, Filipinas a independisa di Spaña y despues a pasa den añanan turbulento di e relacion cu Merca tambe. “E ta un pueblo di Asia, pero culturalmente tin hopi di comparti cu nos,” el a bisa.
Un aspecto ta relaciona cu e religion, ya cu na Filipinas e mayoria ta Catolico y na Aruba nos mayoria ta Catolico. Lampe a bisa cu pueblo di Aruba ta masha agradecido pa tur loke e Filipinonan a nifica pa e desaroyo di Aruba. Un aspecto cu e ex sacerdote aki a destaca ta e hecho cu e pastoornan Filipino ta un di e prome cu a yega di e comunidad aki pa establece na Aruba.
E mandatario a señala cu te awe ainda nos iglesia Catolico tin pastoornan Filipino, y considerando cu Aruba ta un pueblo di mayoria Catolico, nos ta hopi gradicido pa e mision cu e pastoornan aki a cumpli den nos comunidad.
Pero nan tabata colonia Spaño, y nos tambe tabata colonia Spaño. Igualmente Ingles a bira un idioma importante na Filipinas y na Aruba tambe, door di e desaroyo turistico. Kiermen Lampe ta haya cu entre Filipinas y Aruba nos tin hopi parti comun. Te hasta nan ta un pueblo amabel y hospitalario, y nos ta un pueblo amabel y hospitalario.
Pero un aspecto cu Lampe a resalta di e comunidad Filipino, ta su gastronomia of cuminda tipico. “E ta hopi sabroso!” el a bisa na e matutino aki. E mandatario tabata masha entusiasma di disfruta di e cuminda Filipino den e Club Don Bosco, unda nan tabatin un celebracion ayera nochi.
E ta haya cu e comunidad Filipino ta hopi respeta den nos comunidad. Nos tin nursenan Filipino y awor nos tin polis Filipino, y ‘esey ta un señal di aprecio mutuo cu tin.’
Segun presidente di parlamento, Juan Thijsen: Comunidad di Filipina ta humilde, trahado y cu respet
Presidente di Parlamento di Aruba, Juan Thijsen tambe a uni su mes na e palabra di pabien y elogio na e comunidad Filipino den cuadro di nan 121 aniversario di independencia.
Thijsen a felicita e comunidad Filipino riba dia di nan independencia, ya cu e ‘ta algo hopi grandi pa un pueblo, y nos ta celebra hunto cu nan.’
El a afirma cu como presidente di parlamento, e organo legislativo aki ta apoya e comunidad Filipino, y nos ta celebra hunto cu nan e dia di nan independencia, asina presidente di parlamento a declara na e matutino aki.
Igualmente el a laga sa cu e comunidad di Filipina a demostra cu semper nan ta un pueblo humilde y trahado, y tambe un pueblo cu respet. Casi nunca bo ta tende problema cu Filipino, y nan a yuda nos hopi den nos desaroyo economico, social y cultural, segun presidente di parlamento.
“Nan a brasa nos y nos a brasa nan,” el a bisa.
Un factor importante –segun Thijsen– ta cu e comunidad Filipino ta integra den nos comunidad y nan ta respeta nos normanan y balor. Pero tambe nos ta respeta nan, ya cu e Filipinonan ta mantene nan cultura y esey ta algo bon den un comunidad.
