Dos miembro di e gabinete anterior, ex ministernan Mike de Meza y Arthur Dowers a referi na e supuesto motibonan cu e gobierno di Venezuela a bin cu ne pa cera e trafico aereo y maritimo pa 72 ora cu Aruba y tambe cu Corsou y Bonaire.
Segun parlamentario de Meza(AVP) e asunto cu a surgi cu Venezuela riba actividad ilicito cu ta tuma luga, na prome luga nos no por lubida cu cosnan ilicito cu tur hende ta papia di dje, ‘ta origina na Venezuela’. El a laga bon cla cu no ta na Aruba tin acto ilicito ta tuma luga. Sinembargo el a indica cu tin algun excepcion cu nan sa di hendenan cu ta bay Venezuela y busca gasolin pa trece na Aruba, caminda husticia di Venezuela a tuma accion riba e hendenan aki.
Traficacion di koper
traficacion di koper tabata un echo grandi no solamente na Aruba sino na Venezuela tambe, nan a tuma accion. E tempo aya nan a bin cu reglanan nobo caminda nan dos a firma esaki, sr. Dowers como minister di Husticia y sr. de Meza como minister di Asunto Economico.
Tur koper cu ta wordo cumpra for di e importadonan Venezolano pa exporta esaki for di Aruba pa exterior, mester bay cu e documentacion adecuado y nan tabata wordo scrutina na departamento di Asunto Economico, y despues cu nan ta duna nan conseho, e como minister tabata firma esaki. Di e forma aki nan tabata wordo certifica pa por exporta koper. Esaki a trece cu ne un rebaho significante di hortamento di koper na Aruba y tambe di importacion di koper for di Venezuela.
Pero esaki no a keda solamente na koper ya cu otro producto cu nan a para for di Venezuela tabata e webonan. Nan a prohibi e importacion di webo for di Venezuela debi na prevencion di salud publico riba e forma inapropia cu nan tabata wordo transporta pa Aruba. E dos motibo tabata cu nan mes a tuma contacto cu Consul general di Venezuela na Aruba pa haya sa si tabatin mas producto cu nan ta prohibi di sali for di Venezuela. Un di nan tabata webo di Venezuela y p’esey tambe nan a para e importacion di e producto aki. Pero tambe for di e diplomatico Venezolano na Aruba nan a haya un lista di productonan cu despues cu nan a investiga cu nan no tabata bin Aruba.
Tambe na 2015 y 2016 nan tabatin un delegacion grandi di comerciantenan Venezolano na Aruba acompaña pa e minister di comercio, unda nan a organisa exposicion di productonan Venezolano y conferencia cu presencia di ATIA y representantenan di e sector comercial. E biaha ey nan a papia di productonan ilicito cu por causa problema for di Venezuela. Tambe nan a reuni cu diferente partner pa atende e situacion aki entre nan Wardacosta, Duana, APA y otro departamentonan pa bin cu mas reglanan stricto pa atende cu e trafico di producto entre Venezuela y Aruba. Te hasta Free Zone mes a alerta gobierno riba e accion di control stricto aki pa asina nan por informa nan clientenan ya cu e medidanan aki por ocasiona retraso den nan operacion.
P’esey tanto ex minister de Meza como ex minister Dowers a reacciona riba e acusacion di e gobierno actual cu e situacion denuncia pa Venezuela a wordo neglisha for di 2016. Segun sr. de Meza nan a yega di reacciona te hasta prome cu 2016. Sr. De Meza a bisa cu e gobierno cu el a forma parti di dje hunto cu su colega Dowers a actua y tabata tumando e accionnan necesario. Ademas el a laga sa cu e canal diplomatico a keda habri cu e consul di Venezuela, den caso cu e pais bisiña aki ta sinti cu cierto cosnan ta tuma luga pa informa gobierno di Aruba pa nan por a actua riba esaki di un manera dirigente.
