Hopi biaha e casonan lamentabel ta resalta, pero e casonan di exito unda Polisnan ta logra scapa bida no ta causa tanto sensacion. Pero tin biaha, ta bon pa subraya e retonan y e peliger cu Polisnan ta pasa aden pa scapa otro y pa despues resulta cu e mesun hendenan aki di un forma delibera ta expone nan mesun bida na peliger, cu proposito financiero, sin tene cuenta cu den e proceso ta hinca bida di otronan tambe den peliger.
Tabata diasabra pa 1:00pm cu Warda Costa di Caribe Hulandes a haya melding di un boto local den problema basta leu pazuid di Aruba, na posicion 12.21.18 N y 070.09.40 W. Door di distancia comunicacion ta cay afo, locual a haci cu Polis Maritimo a bay hunto cu Warda Costa di Caribe Hulandes cu 2 unidad pa bay busca e boto den problema.
Na yegada pa 2:00pm e boto den problema tabata na posicion 12.23.091 N y 070.13.350 W. Ta trata di e boto cu e matricula A-2149 cu e nomber “Xina” cu 3 persona local abordo, capitan H.A. Geerman, J.C. Bisslik y K.W. Webb. Tanto e capitan como e tripulantenan ta bon conoci pa Polis y Warda Costa pa transporta combustibel entre Aruba y Venezuela. Y pa colmo e boto ta registra bou nomber di D.J. van der Bliek, cu ta mesun doño di boto cu algun tempo pasa a perde riba lama cu varios Arubiano abordo, cu a drif algun dia te yega na costa di Colombia.
Den e negoshi di transporta combustibel, e botonan ta sali di Aruba cu net fuel pa yega mita caminda entre Aruba y Venezuela pa topa e boto Venezolano y tuma fuel despues regresa Aruba. Diasabra ultimo esey mes tabata e plan tambe, pero cu e diferencia cu combustibel a caba cu nan debi cu nan contacto no a yega na ora na e punto acorda pa topa y tuma e combustibel over na un forma ilegal. Esey a pone cu nan a bati alarma net na tempo cu nan tabatin contact telefonico ainda.
E departamento di Polisnan Maritimo di Cuerpo Policial Aruba hunto cu Warda Costa di Caribe Hulandes cu nan base local situa na Savaneta Kamp ta haya cu e persona nan aki ta hopi negligente pa sali cu poco combustibel y pa di 2 biaha caba fuel ta caba cu nan! Danki Dios cu den tur 2 caso tur cos a caba positivo. Pero e lo por tabata pio!
Den e caso aki, Polisnan Maritimo y Kustwacht a keda drif te na un distancia di 13 pa 14 miya zuid/west di Aruba, hincando bida di tur e Polisnan na peliger pa via di negligencia di e personanan aki. Mirando e distancia di Aruba y grandura di e boto y e estado di lama, a opta pa no touw e boto pa Aruba pero pa scapa bida di e hendenan aki y trece nan bek Aruba. Pero for di Aruba famianan a yama amigonan na Venezuela pa trece un bari di gasolin pa nan, pa asina nan por a yega Aruba bek sano y salvo cu nan boto.
Un boto Venezolano a yega cerca y a yuda cu 3 bari di fuel di 15 galon pa asina e boto “Xina” por a yega Aruba bek. A compaña e boto pa waf di Barcadera pa asina regla un ke otro cu inmigracion y Aduana. Door di bon cooperacion di Polis y Kustwacht a logra scapa bida di 3 Arubiano.
Pero, asina mes e defensornan di ley ta haci un apelacion fuerte na tur hende pa ta mas consciente ora nan subi lama. Pa tur cos cu nan boto ta na ordo y no ta negligente den e forma di bay cu poco combustibel abordo pasobra na final….Bida tin mas balor cu material!
