Activistanan ta advertiendo cu tribonnan por resulta victimanan indirecto di pandemia di coronavirus, pasobra al menos cinco di e vacuna di Covid-19 cu actualmente ta den desaroyo ta contene squalene, un componente natural cu actualmente ta fabrica comercialmente di tribon.
Asumiendo cu un di e vacunanan ey termina den produccion global y tur persona riba planeta ricibi dos dosis, mas di mey miyon tribon lo ser mata, segun Shark Allies, un grupo defensor basa na California. Esey potencialmente lo pone den peliger di extincion poblacionnan di tribon vulnerabel, e grupo a bisa, urgiendo mas investigacion pa fabrica squalene di matanan, manera caña di sucu fermenta.
Squalene ta un componente di algun adjuvant cu ta añadi na vacuna pa mehora respuesta immuun, segun Organisacion Mundial di Salud (WHO). Ta un componente di vacuna di grip y varios vacuna experimental, incluyendo pa malaria, segun WHO.
“Cosechando algo di un animal salvahe nunca ta bay ta sostenibel, specialmente si ta un predador top cu no ta reproduci den cantidadnan grandi”, segun Stefanie Brendl, fundador y director ehecutivo di Shark Allies, a bisa the Telegraph. “Tin demasiado desconoci di con grandi y con largo e pandemia aki lo resulta, y cuanto version di dje nos lo mester pasa aden, cu si nos sigui usa tribon, e cantidad di tribon cu lo usa pa e producto aki lo ta hopi halto, aña tras aña tras aña”, el a bisa. “Hopi di e especienan cu ta usa pasobra ta rico den squalene, manera e gulper shark y e basking shark, ta clasifica como vulnerabel, nificando cu nan poblacion ta reduciendo y nan por bay den peliger di extincion si e circunstancianan menasando nan continua.”
Shark Allies ta bisa cu alrededor di 2.7 pa 3 miyon di tribon ya ta wordo mata tur aña djis pa nan squalene. Segun e grupo, e cinco vacuna cu ta contene squalene di tribon ta siendo desaroya pa GSK, Clover Biopharmaceuticals, Seqirus/University of Queensland/CSL, Medicago Inc. y Farmacologós veterinarios SAC/Universidad Peruana Cayetana Heredia.
