(AP) — Human Rights Watch ayera a haci un yamado pa Trinidad & Tobago repatria mas di 90 ciudadano kende a keda deteni como sospechoso di Estado Islamico y nan miembronan di famia den Siria, notando cu al menos 56 di nan ta mucha.
Algun di nan a ser hiba na Siria como mucha pa un miembro di famia, mientras otronan ta bisa cu eroneamente a kere cu nan tabata bay bishita un utopia Musulman.
“E muchanan aki nunca a scoge pa biba bao ISIS (Estado Islamico) pero toch nan ta sufri pa motibo di decisionnan di nan mayornan,” segun Jo Becker, director di defensa di mucha di Human Rights Watch.
Mayoria di e ciudadanonan di Trinidad a keda deteni na fin di 2018 y comienso di 2019 pa forsanan Sirio cu sosten Mericano bringando e grupo di Estado Islamico na nort oriente di Siria, y actualmente ta deteni den camponan improvisa cual activistanan ta bisa ta peligroso y no tin cuminda, awa, cuido medico ni educacion.
Di e mas di 90 Trinitense deteni na Siria, como 21 ta muhe, y 44 di e al menos 56 mucha deteni ta 12 aña di edad of menor, segun e organisacion di derechonan humano, cu a bisa cu a entrevista seis Trinitense deteni na e camponan.
Trinidad & Tobago a repatria apenas un manyen di su ciudadanonan den añanan recien a pesar di al menos 130 di nan cu a biaha na teritorionan di ISIS entre 2013 y 2016, e mayor cantidad di hende per capita di cualkier pais den hemisferio occidental, segun Human Rights Watch.
Hopi di nan a bin di tres comunidad na Trinidad: Rio Claro, Chaguanas y Diego Martin. Un di nan hasta a aparece como combatiente den un revista online di ISIS.
Vinculonan cu terorismo no ta inusual pa e nacion di islanan morocho, cual tabata sede di e unico revuelta Islamico den hemisferio occidental tempo cu un grupo radical a lansa un intento violento di golpi di estado na 1990. Algun di e veteranonan di e golpi di estado aki desde e tempo ey a yuda radicalisa famianan, cual a radicalisa comunidadnan, segun expertonan.
Sin cortenan disponible den nort oriente di Siria pa enhuicia sospechosonan di ta miembro stranhero di ISIS, Human Rights Watch a argumenta cu autoridadnan na Trinidad por enhuicia ciudadanonan unabes cu repatria nan, notando cu un ley anti-terorismo di 2005 ta duna oficialnan hurisdiccion riba e ofensanan aki hasta si nan ta wordo cometi den exterior.
Oficina di prome minister di Trinidad no a responde inmediatamente na un solicitud pa comentario.
Na 2018, gobierno a crea un comite pa repatria y reintegra Trinitensenan for di areanan di conflicto, pero oficialnan ainda ta trahando riba politica y legislacion.
Al menos 10 pais incluyendo bisiña Barbados a repatria algun di su ciudadanonan desde october di aña pasa, segun Human Rights Watch.
