(Reuters) – Elon Musk su plataforma di red social X mester libera informacion cu ta permiti e investigadornan monitor e plamamento di informacion cu por influencia eleccion riba e red, corte Aleman a declara diabierna.
Corte di districto di Berlin a duna su prome decision den respuesta di un documento urgente cu a trece dilanti e siman aki pa dos grupo civil cu a bisa nan tin mester di e data pa nan por monitor mal informacion y desinformacion prome cu Alemania su eleccion nacional di dia 23 di februari.
“Warda mas tempo pa acceso na e data lo debilita e aplicantenan su investigacion mirando cu e periodo inmediatamente prome cu e eleccion ta crucial,” corte a bisa den su veredicto mira pa Reuters.
X no a responde na un peticion di corte pa informacion, e corte a agrega, dunando e compania ordo pa carga e costo di 6,200 dollar di e proceso. “Esaki ta un exito grandi pa e libertad di investigacion y pa nos democracia,” Simone Ruf, abogado di German Society for Civil Rights (GFF) a comenta.
X no a responde na peticion pa comentario.
GFF y Democracy Reporting International a argumenta cu X tabatin e responsabilidad bao ley Europeo di provee acceso ilimita y facilmente accesibel, informacion teoreticamente disponibel pa click via miles di publicacion pero en practica ta dificil pa tin acceso na dje.
E decision ta obliga X ta haci e data disponibel for di awo te cu poco prome cu e eleccion.
E plamamento di mal informacion y desinformacion riba X ta di interes particular mirando e doño su promocion di e ultra derechista Alternative for Germany (AfD), cual ta den di dos luga den encuestanan tras di e conservativonan.
“Solamente AfD por salba Alemania,” magnate di Tesla y confidante di Trump Musk a publica den januari prome cu a conduci un entrevista live cu e partido su lider Alice Weidel.
