Conocido activista Nigel Maduro, kende a bira conoci na Aruba despues cu el a pinta un graffiti di protesta riba e estatua di Driekel, cu e lema “No More Hotels”, ta continua su activismo ambiental na Aruba, e biaha aki cu un propuesta diferente: Beach Party.
Riba su pagina di Facebook, Maduro a post invitacion na su siguidornan pa reuni na un beach specifico cada edicion, pa asina di un forma legal y pacifico “ocupa” e beach en cuestion pa localnan. Ayera, pa e di tres edicion di e evento, e convocacion tabata pa bay na Eagle Beach, dilanti di hotel Iberostar. Riba e poster di invitacion, Maduro ta pidi pa esnan cu ta bay atende e protesta bin cu amigo y famia, poster y borchi, cuminda, bebida, speaker pa musica, beach towel, stoel, parasol, sunblock, suministro pa arte, y bandera di Aruba. Alabes a informa cu lo tin tayer di maneho di desperdicio y sostenibilidad, y di cosemento na e sitio.
Durante cu e tabata na e beach party, Maduro a comparti riba su pagina di Facebook dos video den cual ta mustra con a corta mata di druif dilanti di hotel Iberostar na Eagle Beach. Riba e video, por mira construccion ta andando na e parti dilanti di e hotel, y net dilanti di e heki di e hotel, un rij largo di mata di druif cu a ser corta completamente, lagando solamente un cantidad di tronco sin blachi.
Matanan di druif ta nativo di Aruba, y segun un post di Aruba Conservation Foundation, ta un especie protegi. Esaki ta nifica cu no ta asina sin mas por yega corta e matanan aki. Sinembargo, no ta conoci ki tipo di restriccion lo por tin, ni ki tipo di vergunning por tin pa corta e matanan aki.
E di dos edicion di e Beach Party (Protest) tambe a sigui un modelo similar. E biaha ey, un siman prome, e protesta a tuma lugar dilanti di St. Regis Hotel. Segun Maduro a informa, tabata presentacion di maneho di desperdicio, tayer di sostenibilidad, bon musica, cuminda y bebida, y lo mas importante, “nos a mantene nos comunidad y cultura.”
Pero tambe relaciona cu e evento aki, Maduro a denuncia cu a corta mata di kwihi dilanti di St. Regis Hotel. E activista a post un video riba su pagina di Facebook unda ta mustra e kwihi cu a corta. Kwihi ta un mata protegi di Aruba. Cu un borchi cu tabata bisa “proteha nos kwihi”, Maduro a subi e kwihi cu tabata corta den un accion di protesta.
E prome Beach Party (and Protest) a tuma lugar dia 4 di augustus dilanti Hilton Hotel. E biaha ey tambe a hacie dilanti un hotel cu tin un parti den construccion. E dia ey, Maduro a post video di e construccion pa expansion di Hotel Hilton, destacando e “degradacion di e tereno.”
Maduro a expresa cu e motibo cu ta haciendo e accionnan di protesta aki ta pa tuma back e tera pa e localnan, un manera pa reclama e patrimonio di Aruba for di e turistanan, back pa e Arubianonan disfruta. Esaki sigur ta un tema cu durante ultimo añanan, proporcionalmente cu e desaroyo di hotel y industria turistico na Aruba, a causa friccion entre e habitantenan local.
Recientemente otro usuario di Facebook a lamenta un situacion na Baby Beach, compartiendo un potret unda ta mira un cantidad di tent posiciona pariba di Baby Beach pa turistanan por huur. “Nos a perde un gran parti caba bandi pariba di Baby Beach. Awo e tiki cu a keda pa nos mesun hendenan por disfruta di dje, dilanti e matanan di druif, tambe a wordo tuma over pa esnan cu ta huur tent? E no ta okay. Undjis, full e area ta yena cu tent y no ta keda niun pida beach pa nos mes!”
Reaccionando riba e post, Maduro a comenta: “Esaki ta pakico nos ta haci fiesta na beach. Reclama nos beachnan.” Alabes a informa cu e Beach Party (and Protest) na Baby Beach ta programa pa dia 1 di september.
Tur potret y video ta publica riba pagina di Facebook di activista Nigel Maduro.
