Activismo online ta activismo di berdad?

Prome cu tur cos, mi tin cu bisa cu mino kier bay bek. Ta con mi ta haci bay di blue skies pa un e shinishi sin fin cu ta reina na Hulanda?  Ik weet het niet. Pero bueno, ban papia di e impacto di activismo online.

Un amiga dimi cu ta basta mayor cumi, a bisami poco dia cu e ta haya cu mi ta post mucho hopi y cu podise mi mester cuminsa post “menos” pa hende por aprecia mi trabou of mi poemanan “mas”. Mi ta purba di splica e, cu e demografico di e hendenan cu mi kier yega na dje pa prome, no ta hendenan di su edad y pa di dos nan semper ta online. Pues ami no ta sinti cu mi poemanan y mi postnan tabay perdi. Den wega e ta bisa mi mama:  “Si, Yakari me dijo que estoy vieja y que su poesia no es para mi”. Pero na final, e ta comprende si cu mi generacion simplemente ta opera otro y cual e ta pensa podise no lo traha pa e personalmente, pa mi si ta mustra manera un bon opcion. I am too much, deal with it. I am fabulous. Nos no tabay discuti.

Awo, sinta na Eagle beach cu un bon amiga dimi cu si ta rond di mi mesun edad, (mi tin 23 aña pa esunnan cu a lubida). Nos tabata scuchando cantica di carnaval cu e hut banda di nos tabata toca, comiendo un steak and cheese masha autenticamente Caribense ora nos a cuminsa papia di cosnan cu nos ta haci online. Actualmente mi amiga a dicidi di tuma un break di social media pasobra e ta sinti cu podise e ta haciendo su mes un poco loco. E ta bisami cu tin ora e sinti manera cu hopi hende cu sigui e, ta un poco hypocrita.

Un ehempel cu su mes a dunami, e lo post algo tocante pakico e ta importante pa no “body shame” hende, en especial hende muhe. Pues no bisa hende cosnan cu lo haci cu nan ta sinti berguensa di nan curpa. Hende lo share su post y despues e mesun hende ey ta bira bisa cosnan negativo di otro hende muhe. Esey ta traha un poco riba dje.
Awo, mi ta purba di splice cu e no por laga cosnan asina kita su gana di sigui ta un activista y sigui pusha pa cambio. Na final di dia, nos ta solamente responsabel pa e contenido cu nos ta pone eyfo y no pakico hende ta dicidi di haci cune. Otro cos mas ta cu tin ora bo no por midi e acogida di bo trabou cu “share y likes” so. Si bo ta depende di esey pa duna balor na locual bo ta haci bo ta perde bista di pakico bo ta haci’e. Si ta un hende bo a logra yega na dje, un bida ta suficiente.

Algo cu nos a discuti tambe ta cu hopi hende ta baha e balor di kico e kiermen pa ta un activista kende su trabou ta mas tanto online. E ta online berdad, e ta algo cu bono por gara cu dos man, den bon Ingles, it is not tangible. Pero nos ta crea contenido autentico si,nos ta pone hende cuestiona kico nan ta pensa riba cierto topico y dicon. Na cas y den mi circulo social mi ta pusha hopi discussion tocante rasa y justicia social. Mi ta haci esaki pa malo, letterlijk. Mi haya importante pa misa con esunnan rond dimi ta pensa tocante cierto cosnan. Di berdad, hopi di nos no tin e recursonan pa lansa conferencianan caminda nos por comparti locual nos sa. Hopi di nos no tin con drenta scolnan pa papia cu muchanan y nos no ta carga niun prestigio social pa yega na un bon plataforma. Hopi di nos, pa motibo di ken nos ta y ken di unda nos ta bin ta wordo exclui di cierto luganan tambe. Esey ta un otro conversacion.

Y di experiencia ami por bisa, cu ta muhenan cu tin masha tiki pero ta insisti den comparti locual nan sa cu a cambia radicalmente mi forma di pensa. Ta nan mi tin como ehempel y mas cu tur cos, ta cu nan mi por identifica. Activismo social riba internet tin su balor y no laga niun hende bisabo cu bono ta haciendo nada, compartiendo bo punto di bista y compartiendo informacion balioso riba internet. Nunca bo sa ken ta lesando y miho ainda, nunca bosa ken mester di e informacion.