For di 4 te cu 6 di mei 2022 ta tumando luga na Sint Maarten e Reunion Interparlamentario di Reino (IPKO) entre e parlamentonan di Hulanda, Corsou, Sint Maarten y Aruba.
E reunion di IPKO ta tuma luga dos biaha pa aña. E IPKO aki tabata planea pa tuma luga den januari 2022, pero a keda posponi door di COVID-19 pa luna di mei 2022.
E reunion a cuminsa diaranson 4 di mei 2022 cu e reunion plenario presidi pa e presidente di Parlamento di Sint Maarten, Sra. Heyliger-Marten.
Despues di esaki e cuater delegacionnan a duna cada un un presentacion tocante e desaroyonan recien na nan pais.
Ayera merdia a sigui un sesion informativo tecnico tocante e proyecto di Ley di Reino di Coho (Rijkswet Caribisch orgaan voor hervorming en ontwikkeling).
Despues lo sigui discuti den 4 grupo e diferente temanan relaciona cu proyecto di Ley di Reino di Coho, e paketenan nacional (landspakketten) y nan implementacion.
Awe mainta lo sigui e reunion plenario cu e tema di Leynan di consenso di Reino (consensusrijkswetten), e uso di esakinan y e rol di e parlamentonan den esakinan.
Despues lo sigui discuti den cuatro grupo riba miho relacion y alabes relacion duradero dentro di Reino. Temanan cu lo trata ta:
1. Statuut: cooperacion, ayudo y asistencia, ayudo di likides;
2. Derecho humano, estado di derecho y bon gobernacion;
3. Ehecucion di e mocion di Rosenmöller (EK 35570 IV, L);
4. Ehecucion di e mocion di van Raak c.s. (TK 35099 (R2114), no. 23) y di e mocion di de Graaf (EK 34.300 IV /CXIX, P)
Diahuebs merdia lo tin presentacion di Ministerio di Husticia tocante e sistema penitenciario na Sint Maarten.
Tambe lo tin un reunion informativo di e ‘National Recovery Program Bureau’, sigui pa bishita di trabao na e projectonan di e ‘National Recovery Program Bureau’, cu ta na Princess Juliana International Airport, Sr. Regina Primary School/ Simpson bay Community Center, St. Maarten General Hospital y Brandweerkazerne y na e Sint Maarten landfill.
Diabierna lo habri cu un reunion di presidio. Despues lo tin un bishita di trabao na e prison Point Blanche.
Despues di merdia lo sigui cu e lista di palabracion di IPKO y e conferencia di prensa.
E delegacion Arubiano ta consisti di:
Señor mr. Edgard. G.A. Vrolijk, Presidente di Parlamento en delegatieleider
Señora Shailiny M. Tromp-Lee, Voorzitter CKABB (M.E.P.);
Señor Hendrik W.G. Tevreden (M.E.P.);
Señora Louisette J. Christiaans-Yarzagaray (M.E.P.);
Señor Alvin S.C. Molina (M.E.P.);
Señora Raymicheline M.J. Raymond (RAIZ);
Señor mr. Arthur L. Dowers (A.V.P.);
Señor mr. dr. Ryçond R. Santos do Nascimento (A.V.P.);
Señora Gerlien L. Croes (A.V.P.);
Señora Marisol J. Lopez-Tromp (MAS);
Señor Miguel J. Mansur (ACCION21) ;
Señor Herman C.J. Hek (Griffier der Staten van Aruba).
