Diahuebs ultimo, Biblioteca Nacional Aruba (BNA), Departamento di Cultura Aruba (DCA) hunto cu gestor cultural Mirto Laclé, a presenta un programa multi disciplinario durante nan actividad bou e nomber “Rescate di Memoria.” E tabatin cu enfoke riba diferente disciplina di literatura, arte, cultura, linguistica y educacion en general.
Den un sala completamente yen y cu presencia di Minister Rudy Lampe, Parlamentario Endy Croes y Director di Departamento di Cultura Aruba (DCA), Siegfried Dumfries, a honra un grupo di persona cu a destaca di un forma masha significativo pa loke ta musica arte, canto y diferente expresion artistico pa e pais Aruba y asina hiba e nomber di nos isla mas aya. Directora di BNA, Astrid Britten a gradici e presencia masal di publico y el a referi na e programa intensivo cu a wordo traha e anochi ey. Pero tambe el a laga sa cu e actividad aki ta dedica na e 100 aña di Jo Dania. Igualmente e talentoso, Fredy Montoya a bin cu un show masha gusta.
Durante e actividad aki a duna reconocemento na algun musico y artista local, entre otro Taly Wever, Ronny Kock, Johnny Scharbaay y Frank Williams. Igualmente e actividad aki a bira un ocasion special pa celebra e centenario di existencia di Jose ‘Jo’ Dania. Segun Mirto Laclé esaki a bira ‘un forma di nos pa gradici nan’.
Ayera Endy Croes a bolbe referi na e actividad aki unda a wordo reconoce tanto musico, artista, baluartenan di antaño, y den caso aki un persona ‘masha special’ di Savaneta, Ronny Kock hunto cu Taly Wever kendenan a duna un show musical na agrado di e publico. “Pabien! E tabata un programa hopi bunita. Tabatin hopi hende cu por a gosa di hopi alegria!,” el a bisa. E parlamentario a declara cu ta bunita pa conoce y reconoce nos baluarte, artistanan y musiconan momento cu nan ta na bida.
