Actividad pa salud ta conta pa hende flaco como pa esun cu sobrepreso

Por mira den comunidad cu cada dia tin mas hende ta sufri di presion halto. Sinembargo, ta ripara tambe cu mas persona ta haciendo actividad pa asina keda mantene un bon bida saludabel.

IBISA a informa cu awendia tin hoben cu no ta haciendo movecion, anto esey ta causa problema di obesidad y sobrepeso. Tambe tin e problema caminda mucha ta prefera sinta paden y no bay pafo hunga.

Nan conseho ta pa mayornan curasha y tuma responsabilidad pa nan yiunan haci sport. E plan di IBISA ta pa crea tipo di campaña asina di forma anual pa 2020. “Tin un campaña mundial cu yama ‘know your number’. Nos kier hacie na Aruba mes, unda nos lo wak e cifra di presion, sucu, colesterol y cifra di BMI, pa wak con importante e ta.”

Steven Croes, dokter di IBISA, a splica cu mayoria di biaha a wak hende pero nan mes no sa kico presion halto ta, of ki ora nan tin problema cu sucu, sobrepreso of obesidad. Nan ta kere cu nan ta saludabel sin sa cu nan tin peso halto of algun otro problema.

Croes a duna di conoce cu lo wak con lo bay kibra e barera pa traha un educacion continuo, cu espacio pa hiba y duna mensahe. E ta splica cu cada biaha ta sali mas hende cu presion halto, hende muhe y hende homber ta casi mescos.

“Den documento saca den DVG di 2018, por bisa cu den genero di sexo no tabatin un diferencia grandi. Pa cada hende muhe cu presion halto, tin 1.2 hende homber, pues e ta casi mescos”, Croes a bisa.

Hende por papia di bay gym, facilidad pa cana rond, pa nan tin conocemento di importancia di haci actividad fisico y come bon saludabel. Esey por yuda e cambio di estilo di bida. Pa e motibo aki IBISA ta traha duro pa trece e informacion dilanti.

Pa hende ta facil pa bay cana, bay un supermarket, cumpra cualkier cos cu ta saludabel. Croes ta bisa cu por ta costoso, pero e costo di perde bo salud ta mas caro. E ta recomenda pa evalua kico ta sali mas barata cu ta beneficia e persona.

Croes ta bisa cu ta keda na cada persona pa realisa y tuma e paso pa asina cuminsa haci movecion y actividad fisico, pa asina drenta den e estilo di bida saludabel.

E ta duna di conoce cu accion ta locual hende falta pa asina baha cifra di atake di curason. “Hopi di nos ta consciente cu tin cosnan cu a cambia, pero djis nos ta ocupa nos mente den otro cosnan y nos ta lubida riba nos mes como persona.”

El a duna un comparacion cu tempo di antes, cu bida tabata mas trankil, actualmente cu tecnologia a cambia. Persona ta keda dependiente di nan telefon y di keda conecta, pa nan sa cua ta e ultimo desaroyo. En bes di tuma e tempo ey pa haci cualkier actividad fisico.

Esey ta pone cu e facilidad cu tin, e persona a bira mas floho y mas keto, ‘nos no sa con pa handle globalisacion’ sea radio, media. Tur hende sa cu nan tin cu move pero no ta haci’e pa motibo di nos mes. Sinembargo, e ta bisa cu cada responsabilidad ta keda na cada pashent. Un dokter por bisa un persona pa haci un cambio den su estilo di bida, pero e persona no ta busca pa un cambio.

Tambe nan a comparti cu persona tin cu keda controla. “Locual nan no sa cu e malesa, e parti di no ta activo por mata bo. E persona por ta flaco mes, pero e tin cu move. Si bo wak estudio di actividad fisico mi por biba trankil. Mi por ta flaco no saludabel compara cu e otro cu tin tiki sobrepreso.”

Segun Croes, den estudio a resalta cu persona cu tiki sobrepeso cu ta haci actividad fisico ta biba mas largo cu un persona cu ta flaco pero no ta move. E parti di actividad ta keda importante sin importa ‘flaco of gordo’.

E ta amplia cu na Aruba no ta straño pa wak den e scolnan cu tin mucha for di chikito cu ta sobrepeso, y nan ta buscando diferente manera pa trece cambio y modernisacion den cultura pa ta mas saludabel.

Sinembargo e ta bisa cu mayornan tin cu ta responsabel pa dedica tempo na nan mes y nan yiunan pa ta den actividad fisico. Pero mucho ta prefera duna un mucha un iPad na luga di pone e mucha den futbol.

E ta bisa cu e parti di pone excuus mester caba, y cu hende mester cuminsa tuma punto di haci movecion manera un habito, caminda e dia cu e persona no por haci sport, e ta bay sinti un culpa, ya cu ‘tur dia involucra actividad fisico’.

Awo cu temporada di comemento ta acercando, nan sigur kier sigui cu campaña pa conscientisa y pa comunidad cuida nan mes. “E campaña ta pa conscientisa pueblo riba tema di colesterol y peso.” Tambe nan kier ta mas involucra cu otro fundacion cu ta relaciona cu obesidad pa tuma contacto.