Ayera tardi, fundacion Rancho a informa riba un actividad cu ta busca estrecha un biaha mas e lasonan no solamente comercial, sino cultural entre Guajira y Aruba. E fundacion aki a percura pa mantene bibo e lasonan ancestral cu semper a uni Aruba cu e parti noord di Colombia.

Pa tur hende interesa, fundacion Rancho lo ta organisando un actividad informativo tocante Expo Guajira, dia 29 di october awor na Centro di Actividad Rancho. Expo Guajira ta habri oportunidad pa Aruba tambe participa den dje.

Expo Guajira.
Durante un conferencia di prensa cu a tuma luga den Centro di Actividad Rancho, Stanley Dabian di Departamento di Cultura di Aruba (DCA) a bisa cu e instancia aki di gobierno hunto cu Fundacion Rancho ta promoviendo e actividad aki. Ta asina cu for di dia 20 te cu 24 di november, Expo Guajira, lo tuma luga caminda tur hende y instancia interesa ta bonbini.

Dabian a bisa cu ta importante pa Aruba exporta loke ta di nos pa asina haci e intercambio aki uno interesante. “Nos ta spera cu e actividad aki por ta e continuacion cu den pasado tabatin entre Aruba y Guajira,” el a bisa.

Presidente di Stichting Rancho, Clifford Rosa, a bisa cu como fundacion, semper nan a boga pa e intercambio cultural y comercial entre Aruba y Guajira.

P’esey nan ta anuncia e actividad Expo Guajira cerca nos comunidad, ya cu e ta un actividad cu nan ta bin elaborando pa basta tempo caba. “Aworaki nos ta yegando den un posibel ehecucion di e proyecto,” el a bisa.

E fundacion a haya un invitacion di Camara di Comercio di Guajira pa nan Expo Guajira. Fundacion Rancho ta den preparacion pa ofrece e oportunidad na tur comerciante y culturista, investigado, academico, etc. por bay Guajira pa cinco dia. Pa esunnan interesa pa bay na Expo Guajira, fundacion Rancho tin cierto cuponan reserva, y libremente por tuma contacto cu nan.

Rosa a bisa cu den 5 dia nan tin un programa extenso pa ofrece, saliendo dia 20 di november pa atende e apertura di dia 21 di november. E ta un programa extenso cu cada persona interesa por crea su propio agenda.

Esaki ta e di 19 aña cu Expo Guajira ta wordo organisa. E tin diferente seccion cu tin di haci cu moda, cultura, comercio, salud, etc.

Rosa a aplaudi e echo cu Camara di Comercio di Guajira ta keda sostene e intencion cu fundacion Rancho tin caba pa hopi tempo. E hecho cu nos tin un contacto aereo entre ambos destino ta yuda pa crea e interes pa bolbe explora e oportunidadnan bilateral riba tereno comercial y cultural.

Expo Guajira ta un plataforma no solamente comercial -segun Rosa- sino cu e ta duna e oportunidad pa e hendenan den e ramo di cultura, academico, sostenibilidad y innovativo. Tambe esunnan cu ta buscando un transformacion di Guajira riba sector turistico.

Rosa a laga sa cu pa Aruba e ta crea oportunidad comercial y cultural cu nos pais por forma parti di dje den un futuro hopi cercano. Igualmente e fundacion aki ta motivando mas hende cu por ta interesa na Corsou y Bonaire. “Tin posibilidad enorme entre Guajira y e tres islanan mas cerca di e costa Colombiano,” el a bisa

Festival Vallenato femenino.
Den cuadro di e conferencia aki a keda anuncia cu e compositor y cantante di Vallenato, Glenda Zabala-Maduro, ta bay participa den un Festival Internacional di Vallenato pa hende muhe so.

Maduro ta hayando e sosten di fundacion Rancho pa bay representa Aruba den e magno evento femenino di musica Vallenata na Valledupar. E lo tuma luga for di dia 22 te cu 24 di november proximo. Fundacion Rancho lo sigui duna mas informacion y presentacion pronto tocante e cultura di Vallenato na Aruba.