ORANJESTAD – Ayera tabata Dia Mundial di Actividad Fisico. Un dia mesun importante cu otro dia conmemora pa Nacionnan Uni. Ya cu actividad fisico ta importante no solamente pa nos condicion fisico, sino tambe pa nos salud mental.
Tanto departamento di salud publico (DVG) como Ibisa ta pone atencion special riba e dia aki, debi cu actividad fisico ta reduci e chens di haya malesanan cronico cu ta afecta nos comunidad, manera presion halto, diabetes, obesidad, problema di curason, etc.
“P’esey WHO (Organisacion Mundial di Salud) ta conseha pa haci minimo 30 minuut di actividad fisico tur dia,” asina promotor di salud di DVG, Jurette Croes a declara.
Pa conmemora e Dia Mundial di Actividad Fisico, Ibisa tin diferente actividad planea. Edgar Eramus di Ibisa a declara na Bon Dia Aruba, cu nan kier stimula nos poblacion pa haci actividad fisico tur dia. Pa esunnan cu ta traha, Ibisa ta recomenda pa haci ‘pausa activo’ tambe. Si 30 minuut bo tin cu move pa dia, esaki tambe por ta den un forma di intervalo di tres biaha 10 minuut pa dia tambe. Asina bo por cumpli cu e linea basico pa hiba un estilo di bida saludabel. Asina tambe bo por cumpli cu bo compromisonan diario. No mester lubida cu actividad fisico tin tres elemento importante: aerobic, forsa y flexibilidad.
Erasmus a laga sa na e matutino aki cu e conscientisacion pa realisa actividad fisico a aumenta den nos poblacion. Ibisa ta trahando un guia, unda tur hende mester sa di dje pa asina nan por logra e meta pa nos poblacion move mas. “E conscientisacion ey poco poco ta birando miho,” el a bisa. Nan ta ripara cu e participacion di hende den diferente actividad, manera caminata, a aumenta. Pero tambe e cantidad di actividadnan fisico organisa pa diferente instancia y fundacion a subi.
Dr. Steven Croes a indica cu e beneficionan di realisa actividad fisico ta ilimita. Entre nan, actividad fisico ta haci nos curason mas fuerte y nos pulmon mas fit, locual ta permiti pa nos sistema cardiovascular por reparti mas oxigeno den nos curpa den cada batimento. Tambe nos sistema pulmonar ta aumenta e cantidad di oxigeno cu e por tuma of drenta via nos pulmonnan.
Ehercicio fisico regular tin e beneficio di baha e nivelnan di presion di sanger. E ta yuda pa baha e nivel di colesterol malo y aumenta e nivel di colesterol bon. Esaki ta yuda pa baha e riesgo di un malesa cardiovascular, manera atake di curason . E riesgo pa haya atake cerebral ta disminui tambe.
