Ayera a tuma luga e di cinco edicion di e actividad di “Feed the Kids” organisa pa GLW Foundation. George Winterdaal, presidente di GLW Foundation, a elabora tocante e meta di “Feed the Kids, di unda e idea a nace pa cuminsa cu e iniciativa aki y otro proyectonan di GLW Foundation.
Winterdaal a splica cu esaki ta di cinco aña cu GLW Foundation ta organisa e iniciativa di “Feed the Kids”. El a sigui splica cu e idea pa cuminsa cu e iniciativa aki a cuminsa den pleno pandemia durante cual Winterdaal tabata pensa kico lo por haci pa celebra di un manera of otro dia di mucha. Door cu e momento ey, pa motibo di restriccionnan, no tabatin mag di topa cu niun hende y di eynan e idea a bin pa hacie un estilo “drive thru” (den auto).
El a indica cu door cu e estilo drive thru a funciona asina bon, e fundacion a dicidi pa keda haci’e di e mesun manera. Winterdaal a splica cu e muchanan ta yega den auto cu nan mayornan, ta pasa na entrada y ta haya un pakete cu tin un pan cu hotdog y un juice den dje. El a resalta cu e meta di e iniciativa ta parti algo chikito y leuk na e muchanan pa celebra dia di mucha di algun manera.
El a indica cu normalmente e actividad ta ser realisa riba Dia Internacional di Derechonan di Mucha, cual ta 20 di november, pero e aña aki pa algun motibo personal, perdida di familiar y algun otro cos, no a logra haci’e riba e fecha cu ta custumber y a pensa e ora pakico no haciele toch den luna di december pasobra “tur dia ta dia di mucha.” Asina e fundacion a scoge pa haciele algun dia prome cu Pasco.
Pa algun dia caba boluntarionan di e fundacion ta preparando e paketenan. Riba e dia aki GLW Foundation a prepara un total di mil pakete cu a ser reparti na e muchanan. Algun a ser reparti na Centro di Bario Tanki Leendert y otronan a ser reparti na San Nicolas tambe.
Winterdaal a destaca cu e paketenan ta gratis, e muchanan ta simplemente yega na e localidad, nan no mester inscribi ni nada, y nan ta ricibi nan pakete den auto y sigui nan caminda.
GLW Foundation ta organisa diferente proyecto y Winterdaal a resalta cu te cu aworaki e proyectonan a bay hopi bon. El a conta cu recientemente tambe tabatin otro evento, organisa pa di cuater aña consecutivo, specialmente dedica na muchanan special di Bibito Pin y Duna un Man, caminda e muchanan a pasa un rato hopi leuk.
El a indica cu pronto tambe e preparacion ta bay cuminsa pa un otro iniciativa cu e fundacion tin varios aña ta organisa, e proyecto di Cupcake di Speransa cual ta ser organisa alrededor di e fecha di Valentines Day. “Manera cu dos di januari drenta ta cuminsa traha riba e proyecto aki,” el a remarca.
Esaki ta bay bira e di nuebe edicion di Cupcake di Speransa y tur aña ta scoge un of dos mucha cu tin algun dificultad of enfermedad medico y ta dedica e evento di Cupcake di Speransa na e mucha(nan) pa yuda cu e ayudo medico necesario pa e mucha(nan).
GLW Foundation ta e fundacion encarga cu organisacion di certamennan di beyesa Miss Teen Aruba Internacional y tambe Miss Turismo Mundial, pero e fundacion ta para pa hopi mas cu beyesa, segun Winterdaal, “e ta para tambe pa aporta na cosnan positivo den comunidad,” el a enfatisa.
