Departamento di asunto economico di Aruba a organisa pa henter aña diferente curso, tayer y training pa comerciante chikito of persona cu tin intencion pa cuminsa negoshi. DEACI a haci entrega di certificado na tur esunnan cu a colabora.

Director Maria Dijkhoff-Pita a comparti cu pa 2019 a bay bon y ta contento cu e acogida di unidad Idea y Exprodesk. Ambos unidad tin dos meta diferente. Idea ta mas pa duna ideanan basico ora un persona kier cuminsa un negoshi, locual ta parti administrativo, ‘marketing, business plan’ cu mester sa, of ora un persona kier cuminsa cu negoshi.

Pa locual ta trata Expordesk ta pa esunnan cu ta bay cuminsa exporta. Un persona tin un producto, e tin un servicio anto tin un calidad y ta cuminsa stap pa stap pa exporta; pa esey nan ta duna guia.

Tin varios comerciante chikito cu a tuma iniciativa pa haci esaki. E departamento tambe ta conta cu un grupo activo cu ta haya coaching di exterior y local, pa asina e comerciante por logra exporta nan producto.

“Nos curso a bay bon y nos ta satisfecho cu nos tin participacion, pero nos ta agradecido cu compania na Aruba pa por haci curso y training aki posibel. Sin Idea cu Exprodesk no lo a logra esaki. Nan ta boluntario, cu no ta cobra pa haci curso, y varios di nan ta bin mas biaha pa duna e curso y nos ta purba haci’e separa pa nan no ta aki tur siman”, Dijkhoff-Pita a splica.

Tambe nan tin diferente departamento di gobierno cu ta yuda nan, manera Santa Rosa, departamento di Labor, DIMP (departamento di impuesto), departamento di Cultura cu a contribui. El a gradici prensa pa hiba e mensahe na otro comerciante y transmiti informacion necesario.

Pa 2020 nan lo bin cu mas tayer cu aña pasa. Nan lo bay purba pa tin 3 tayer di Idea y Exprodesk pa cada luna, caminda nan por hinca 40 persona pa tuma e tayer. “E sala ta adecua pa curso y tin capacidad pa duna mas y yuda mas comerciante.”

Ta organisa un curso cu ta maximo pa 40 persona, pero ta haya peticion pa bolbe ripiti, pa motibo cu e lista di espera ta grandi. Y claro si e docente/comerciante ta dispuesto y kier contribui pa duna e curso atrobe.

Minister Xiomara Ruiz- Maduro a duna un palabra di gradicimento na tur esnan cu a yuda facilita e proyecto cu Exprodesk y Idea a realisa pa entrena empresa priva. Tambe na departamento di gobierno y prensa pa duna informacion na empresario cu kier sigui un curso na DEACI.

Segun e mandatario, e tipo di evento aki ta pone cu mas compania ta sigui nan meta sigur y ta empodera e mundo comercial na Aruba. Pa asina nan inspira e hoben cu idea grandi, pa e muchanan bira comerciante. E grupo di persona cu ta bayendo cu pensioen tambe ta haya informacion pa cuminsa cu nan negoshi.

Pa e parti digitalisacion, departamento Economico ta trahando un portal pa asina por sigui cu e parti digital, pa asina mescos cu DIMP, e comerciante por entrega nan papel di belasting pa luna di forma digital.

Sinembargo pa haci esaki nan mester haci inversion necesario pa publico.

Dave Martinus di ActionCoach ta un di esunnan cu a contribui pa yuda comerciante. Martinus ta bisa cu pa su persona tabata un placer, mirando cu Aruba tin comerciante cu ‘hopi idea pa trece negoshi’, pero falta di conocemento ta keda un reto grandi.

E ta bisa cu ta importante pa e como coach of otro empresario cu ta contribui pensa con nan por haci mas pa yuda stimula economia. “Si nos yuda un hende draai nan negoshi, logicamente, e tambe por contribui na economia di Aruba.”

Segun Martinus, ta mas cu un placer pa hacie mas bes pa aña. E ta bisa cu den curso a wak hoben cu ta bay universidad y hende cu ta baha cu pensioen cu kier ta productivo. Nan ta persona cu no kier depende di un entrada, pero ta haci un negoshi p’asina crea otro entrada y por sostene nan mes.

A puntra Martinus mirando e ‘cost of doing business’, si tambe ta comparti preocupacion pa cu e tema aki, mirando cu e ta uno cu comerciante ta preocupa. Martinus ta contesta cu durante siglo semper economia a keda bira mas caro, sinembargo e ta bisa cu cada biaha ta keda na comerciante bira mas creativo pa sali di situacion y haci locual necesario pa tin e mesun efecto.

“E topico aki ta importante pasobra e comerciante cu ta djis wak e parti di costo di negoshi ta halto, pero ta sinta keto y wak con cosnan ta cay riba nan. Mas bien, nan tin cu tuma accion, papia cu hende, bira creativo y bin cu solucion”, el a expresa.