Den luna di december 2016 a pasa un caso caminda famianan di un miembro di sindicato T.O.P.A. no por a ‘cobra’ e suma cu ta destina pa cubri gastonan di entiero. E caso aki a laga algun miembro di e sindicato den poco preocupacion ya cu ta paga mensualmente pa miembresia y esaki ta encera entre otro un seguro cu ta cubri gastonan di entiero.

E version di e trahadonan di un departamento di Gobierno, ta bisa cu nan nunca a wordo informa di un ‘dokter’s verklaring’ cu mester entrega, cual nos a comprende cu ta e motibo cu no a paga e suma di e seguro. Bon Dia Aruba a acerca sindicato T.O.P.A. pa haya un bista di locual a sosode den e caso aki, di cual un splicacion amplio a keda duna. Pa loke ta e persona encuestion cu a fayece, T.O.P.A. no por a divulga hopi informacion pa motibo cu esaki ta confidencial.


Seguro
Na momento cu un persona bira miembro di sindicato T.O.P.A., e mester yena un formulario cu ta encera entre otro su condicion di salud. Anteriormente e sindicato tabata sigura su miembronan cu e compania British American Insurance (BAI) cu tabata tin su propio format di formulario. E formulario di BAI no tabata exigi extra evaluacion. Desde 26 di Augustus 2015, e compania Nagico a manda un carta pa sindicato T.O.P.A. informando cu nan a ‘tuma over’ BAI y cu desde e fecha aki pa dilanti nan tin un formulario nobo.  Despues cu miembronan yena e formulario di Nagico, a base di e informacion cu keda suministra riba e prome formulario, Nagico por manda un di dos formulario titula ‘questionnaire’ cu ta pidi un declaracion medico. E ta responsabilidad di e miembro pa e declaracion aki keda entrega na Nagico directamente ya cu ta contene informacion personal cu T.O.P.A. no mag di tin acceso na dje.

 

Proceso
Bon Dia Aruba a puntra e sindicato di e proceso cu nan ta aplica pa miembresia y con ta duna informacion. E sindicato a enfatisa cu na momento cu bira miembro tur informacion ta wordo duna na kantoor y tambe pa medio di un shop steward. Si mester bin un cambio cu ta afecta tur miembro, e sindicato lo haci esaki publico y tambe pa medio di nan shop steward na cada departamento. Den e caso di e cambio di seguro, T.O.P.A. ta enfatisa cu esaki ta conta solamente pa miembronan cu a bin despues di 26 di augustus 2015 y no ta afecta aseguradonan cu ta miembro prome cu e fecha menciona.

 

E caso
T.O.P.A. ta splica cu ta lamenta e fayecimento di e miembro y cu lastimamente e miembro aki no a completa e proceso di seguro. E persona aki a bira miembro na juni 2016 y a wordo splica e proceso cu e mester cana. E sindicato a splica e famia kico a pasa den e proceso y cu no por haci nada ya cu e persona no a entrega e declaracion medico segun exigencia di e seguro.

Sindicato T.O.P.A. a finalisa splicando cu durante aña 2016 tabata tin solamente 5 caso cu mester a yena e extra formulario di Nagico y a enfatisa un biaha mas cu tur persona cu ta miembro prome cu 26 di augustus 2015 no mester haci nada extra.