Mediante un publicacion riba nan pagina di Facebook oficial Aruba Conservation Foundation (ACF) a anuncia cu nan ta restart cu e proyecto di monitoreo di Cascabel di Aruba den un esfuerso pa yuda proteha e especie endemico aki.

E proyecto aki di ACF cu algun tempo atras tabata ser realisa den colaboracion cu diferente experto pero a stop pa un tempo, awor a restart y ta ser realisa den colaboracion cu expertonan di e especie endemico aki Dr. Jeff Goessling di Eckerd College na Florida y Dr. Matt Cross y su team di The Toledo Zoo na Ohio.

ACF a remarca cu e continuidad di e colaboracion aki ta enfoca riba studia e colebra endemico di Aruba (Crotalus unicolor), conoci localmente como e Cascabel.

Recientemente, e team tabata aki na Aruba pa colecta dato valioso basa riba nan habitat y populacion pa sostene e esfuerso di ACF di conservacion y pa train e ekipo di ACF.

E Cascabel ta un especie cu ta ser haya solamente na Aruba, haciendo e un parti esencial di e herencia natural unico. Monitoriando nan movecion y cantidad ta yuda e fundacion proteha e Cascabelnan aki miho y tambe mantene e habitat di cual nan ta depende.

E tin tamaño modera y ta alcansa un largura adulto di aproximadamente 90 cm, y ta pisa mas o menos 1 kilogram. E ta color bruin cla, bruin, of casi ros, reflehando e color di tera di su habitat nativo, cu markanan bruin mas scur den forma di diamanta, pero e color por varia di blanco pa peach, of bruin pa berde scur. E marcanan tin biaha ta casi invisibel, of por ser mira solamente den un strepi chikito memey di e parti patras.

E especie endemico aki, cu ta ser haya solamente na Aruba ta existi solamente den habitatnan di mata di sumpiña y desierto riba e mitar zuidoost di e isla.

E cascabel di Aruba ta entre e especie di cascabelnan mas raro na mundo. Mientras cu exportacion for di e isla ta ilegal, e especie aki no tin otro proteccion huridico riba e isla tampoco. E proyecto di monitoreo di Cascable di ACF ta crucial pa proteha e especie remarcabel aki y preserva e biodiversidad di Aruba

E Cascabel di Aruba ta come varios especie parha y lagadishi. E macho ta yega na madures sexual den kuater aña y e muhe den cinco. Despues di un periodo di gestacion di cuater luna, e muhenan ta duna lus na entre cinco y diescinco yiu bibo den un solo biaha.

Den caso cu un persona topa cu un Cascabel den su propiedad, ACF ta pidi pa tuma contacto cu e ACF Wildlife Hotline y e ekipo lo sigura cu e colebra ta ser relocalisa na un manera sigur, si ta necesario.

Keda pendiente pa un entrevista cu experto di Cascabel di Aruba Conservation Foundation pa mas informacion.

Potretnan: Facebook Aruba Conservation Foundation