(LaNacion) – Cu e tension entre Rusia y Ucrania den escala maximo, gobierno Argentino a fortalece su acercamento na Moscu den materia militar den ultimo dos aña. Esey ta traduci den negociacionnan frecuente pa cumpra unidadnan pa ekipa e Forsa Arma y un acuerdo pa oficial y sub-oficial Argentino por capacita den centronan di formacion di excelencia di Federacion Ruso.
E convenio aki tin e base pa militarnan Argentino por train den vuelonan di piloto, curso di buceo y di tiramento, entre otro opcionnan di formacion, incluyendo siña idioma Ruso.
Esaki a ser firma na december di aña pasa pa minister di Defensa Jorge Taiana, despues di e bishita cu secretario di Asuntonan Internacional pa Defensa, Francisco Cafiero a realisa na Moscu. Eynan el a ser ricibi pa e vice-minister di Cooperacion Militar Internacional di Rusia, Alezander Fomin, cu awe tin un protagonismo fuerte den e conflicto cu Ucrania.
Den e mesun siman cu a firma e acuerdo di formacion militar, cu ta inclui “capacitacion doctrinario y operativo”, presidente Alberto Fernandez a ricibi den Cas Ros un delegacion di 32 empresario Ruso.
Ekipamento di aeronave no ta un topico insignificante. Rusia ta ofrece agrega un armamento antiaereo similar na esun cu Forsa Arma di Venezuela ta usa, considera di halto calidad pa fuentenan militar. E oferta di MIG-35, di tur manera, ta competi cu proposicionnan di otro paisnan, como JF-17 cu China ta fabrica na Pakistan y F-16 di Dinamarca, cu e mesun Taiana a ricibi.
E relacion entre ambos pais den materia militar tambe ta refleha den e acuerdo pa mantencion di dos helicopter MI 171 di Forsa Aereo, adkiri for di Rusia na 2010. Nan ta multi-proposito y di alcance largo y nan ta wordo utilisa den campaña di abastecemento na e base Antartico y na operacionnan di buskeda y rescate. E gobierno di Putin a transmiti un propuesta pa bende otro dos unidad na Argentina.
