(NLTimes) – Hulandesnan generalmente ta mas positivo ora ta trata di acepta homosexualidad. Asina ta para den un estudio cu e Secretario di Estado pa Igualdad di Oportunidad Mariëlle Paul a comparti cu Camara Abao di Parlamento Hulandes, Tweede Kamer. E aña aki, 86% di ciudadano a indica di ta positivo pa loke ta trata acepta hombernan homosexual y muhe lesbiano, cantidad aki tabata na 76% na aña 2020.
A pesar di esaki, e aceptacion di otro gruponan LGBTIQA+ ta mas abou. Por ehempel, 66% ta positivo tocante hende bisexual. Un carta parti ta considera e grupo un “moda”, e estudio a bisa. Poco mas cu mita di ciudadanonan cu a participa (53%) ta positivo tocante hende no-binario. E porcentahe di hende cu lo haya cu ta un problema si nan yiu ricibi les na scol for di un maestro transgenero a subi di 9% pa 14%.
Hende LGBTIQA+ ta experiencia mas odio y discriminacion online cu cis-heterosexualnan, of miho bisa, hende cu tin e mesun identidad di genero cu nan sexo di nacemento y ta sinti nan mes atrai na e otro sexo.
Tur grupo LGBTQIA+ tambe a bisa cu nan tin mas chens di pensa riba con nan ta comporta nan mes den publico, por ehempel, ora ta trata di expresa amor pa un otro hende.
E organisacionnan Panteia, Movisie y Ipsos I&O a ser pidi door di Gabinete Schoof I pa haci un encuesta cu casi 2,500 persona. Edicionnan anterior tabata enfoca solamente riba personanan LGBT, e biaha aki, e investigadornan a distingui mas diferente grupo entre e comunidad.
Ademas di hende lesbiano, homosexual, bisexual y transgenero, nan a wak tambe hende no-binario, queer, intersexual y asexual, hende LGBTIQA+ di color y hende LGBTIQA+ cu un desabilidad.
Solamente hendenan cu tin 18 aña of mas a participa den e estudio aki. Un otro estudio riba aceptacion bou di hobennan lo ser conduci despues.
