Si nos kier cuminsa atende cu e problema di sobre peso cu tin den comunidad, mester cuminsa na educa comunidad pa habri wowo na locual ta robes. Bon caminda pa cuminsa logicamente ta cerca e chikitinnan, pero pa haci esaki efectivamente mayornan mester ta consciente riba e importancia pa custuma nan yiu na un estilo di bida saludabel.
Aki na Aruba nos tin e tendencia cu nos ta gusta come (y bebe), na diferente ‘get together’ of fiesta. Es mas, bo haci un fiesta mester tin abundancia di coy come. E salada di macaroni, cu e aros con pollo, cu e banana hasa den banda, tur fuentenan rico na carbohidrato, locual cu ta innecesario. Ora cu topa cu un ser keri y e ta mustra ‘yen’ (sobre peso), esaki bo ta tende: “Hey, bo ta mustra bon comi, bon cuida”. Asina hopi biaha bo ta wordo incentiva pa e hecho cu bo no ta un peso saludabel pasobra e ta representativo cu “cos ta bon, bida ta bon”. Tin un situacion similar cu ta sosode cu muchanan chikito cu ta ‘gordo’. “Ay, e ta bay rek ora e bira mas grandi ora e ta den puberteit.” of “Lage come ta mucha e ta”. Esaki ta robes, un biaha mas ta uzando excuus pe echo cu un persona ta sobre peso. E no tin di haber cu apariencia, sino e daño cu esaki ta haciendo na salud di un persona y pio ainda si ta un mucha di 4 pa 5 aña. Ta berdad cu un mucha den fase di pubertad ta bay rek etc. segun su curpa ta cambia y desaroya pero lamentablemente e patronchi di come ta wordo crea di chikito. Otro mito cu hopi ta uza ora cu nan subi riba balansa y realisa cuanto nan peso ta, ta cu nan ‘weso ta pisa’, algo cu ta robes, segun factornan manera bo edad y haltura entre otro, tur weso tin un averahe, y e cantidad no ta varia masha for di esun di un persona saludabel y esun di un persona sobre peso.
‘Set point’
Nos curpa tin masha hopi vet cel (miyones), segun bo subi di peso e cantidad di vet cel cu bo a nace cun’e ta yena. Si tur e cel nan aki yena esakinan ta dividi nan mes y si bo baha di peso atrobe, e contenido di e vet cel nan aki ta baha, sinembargo e cantidad di vet cel cu a bin acerca ora cu bo tabata pisa mas hopi ta keda existi. Y tur e vet cel nan aki tin un memoria algo conoci como ‘set point’. E cel nan aki ta corda con yen nan tabata un tempo y nan ta keda pa hopi aña cu e memoria aki, asina mandando bo señal cu bo tin hamber indicando cu tin espacio pa mas. No ta cla pa cuanto aña e memoria aki ta keda, sinembargo algun specialista ta bisa cu e por dura 7 aña, prome cu e vet cel realisa cu bo no ta plania pa yena esaki bek. E set point aki ta un di e factornan cu ta splica tambe pakico e ta dificil pa un persona cu a perde hopi peso, tin dificultad pa mantene e peso aki.
Tuma responsabilidad
A yega ora pa stop di culpa genetica y bin cu diferente excuus pa e motibo cu ta sobre peso y para responsabel pa bo accionnan. Ora bo scoge pa culpa bo genetica pa e motibo cu bo ta gordo, ya bo no ta haci bo mes responsabel pa e problema y basicamente bo ta acepta e hecho.
E realidad inhusto ta cu tin persona cu nan sistema ta traha diferente cu di otro cual berdad por haci cu a pesar cu dos persona come pa mesun cantidad di tempo e mesun cuminda malo etc. , uno ta desaroya problemanan di salud y e otro no, uno ta subi mas di peso cu e otro. Pero a pesar cu e genetica den e caso aki ta na ‘fabor’ di un persona, ambos tin e den nan man pa controla nan manera di come y mantene nan mes saludabel, kemen e persona ta den control y no e genetica. Algo hopi importante ta tambe pa preocupa bo mes cu locual cu bo por controla. Bo no por wak curpa y peso di un otro persona y desea di ta mescos cun’e, pasobra kisas bo curpa simplemente no ta crea asina, cual ta oke. Importante semper mester ta, pa bo ta na un peso saludabel, curpa saludabel y mente saludabel.
Acepta bo genetica y ken bo ta, pero no acepta un estilo di bida cu no ta saludabel. E ta bo responsabilidad pa bo come e berduranan necesario pa bon funcionamento di bo curpa, haci ehercicio, drumi suficiente, reduci stress mas hopi cu ta posibel etc. Bo no por controla tur cos, pero bo por controla mas cu bo ta kere y si ta necesario busca guia di un coach profesional.
