Serlimar ta lidia cu problema financiero desde su inicio, y prome cu esey tambe como servicio publico directamente bao di un ministerio. Esey no a cambia despues cu el a bira un empresa ‘sui generis’ dia 1 di juli 2005. E traspaso di bienes di pais Aruba pa e persona huridico ‘independiente’ a bay asina amateuristico, cu tanto aña despues ainda accountant cu ta trata di descifra tur cos, no por keda cla.
For di un copia (di parti) di e declaracion di e accountant contrata, den e caso aki PriceWaterhouseCoopers (PWC; actualmente Grant Thornton), nos por deduci cu no solamente e traspaso menciona ta duna problema pa por conclui exactamente kico tabata e patrimonio di e empresa riba e fecha ey, sino cu e problemanan di un administracion deficiente a bira un problema cronico. Den e carta di PWC fecha 20 juni 2018 ta duna un resumen di punto problematico relaciona cu e traspaso inadecua cu a tuma luga na 2005, tempo di e inicio di bida institucional di Serlimar, y den e añanan despues.
Ta indica cu pa e fecha di e carta di PWC (20 di juni 2018) ainda no ta regla un determinacion di kico ta e propiedadnan mobil cu riba dia 1 di juli 2005 mester a traspasa pa Serlimar, algo cu mester tabata regla segun articulo 14 di e ley di Serlimar. Tampoco ta regla pa fecha di e carta e propiedadnan inmobil (terenonan) cu mester a pasa pa Serlimar den forma di erfpacht (art.15). Tambe PWC ta remarca cu den e ley no ta menciona un compensacion pa e compleho empresarial cu Serlimar ta uza y cu ta aparece riba balans cu como ‘tegenpost’ e descripcion ‘inbreng Land Aruba’.
Dia cu Serlimar a bira un entidad riba su mes, segun PWC, no tabatin un balansa di traspaso y tampoco tabatin un inventarisacion di bienes (mobil y inmobil) cu e entidad a haya di banda di gobierno. A consecuencia di esaki, e accountant no por a establece si mester eventual coreccion pa loke ta e activonan fiho material, den e ‘inbreng Land Aruba’ den capital, ni di debe na Pais Aruba.
Tambe ta constata cu na 2005 ainda Pais Aruba a paga mas di Afl. 8 miyon di gasto pa Serlimar, mientras no tabatin un areglo o convenio pa esaki. A administra e gastonan den winst/ verliesrekening y a pasa esaki via destinacion di e resultado na e reservanan den capital. No tabatin un ‘verrekening’ tampoco. Por lo tanto, no tin claridad encuanto kico ta responsabilisa of no den e rubro capital como ‘inbreng Pais Aruba’, ‘demas reserva’ y debe na Pais Aruba.
Pa loke ta e entrada di cobransanan pa recoge desperdicio y otro servicionan na gobierno, desde 2015 tin un areglo. Pa e añanan anterior, te cu 2014, no tin nada regla y ta crea duda si mester coreccion si of no pa e entradanan responsabilisa of no pa e añanan ey.
Resumiendo tur esaki, PWC ta yega na e conclusion cu ta abstene di duna un valoracion di e cuenta anual di 2015. Tambe ta duna un opinion tocante e pensamento di e management, vocifera den e splicacion general di e cuenta anual, cu management no ta kere cu e empresa lo haya problema di continuidad, ya cu e problemanan aki lo desaparece den e añanan venidero y cu gobierno lo haci un aporte na esaki. PWC ta bisa cu e situacion aki ta indica cu tin un incertidumbre di importancia material, a base di cual tin duda rasonabel di e suposicion di management di Serlimar. Cu otro palabra: tin temor cu e problemanan ta continua.
Tur loke ta describi aki ta hiba e accountant na e conclusion cu no por duna un valoracion encuanto e confiabilidad di e cuenta anual 2015. Tin incertidumbre grandi tocante e cifranan real cu ta traspasa of no pa e siguiente añanan, y kico nan impacto ta riba e estado financiero actual, ya cu no tin cuenta anual aproba tampoco pa e añanan mas reciente. Esaki naturalmente ta duna hopi di pensa, no solamente tocante e maneho operacional di e empresa, sino tambe di e maneho financiero, cu ta duna e impresion di tabata deficiente y debil desde prome momento. E ta duna di pensa tambe tocante e cifranan preliminar cu a duna por ehemplo na CAft, den cuadro di nan evaluacion di e ‘sector colectivo’ pa aña 2015 te cu 2018, di cual Serlimar ta forma parti. Den e rapportnan di CAft nos ta haya cu pa e añanan 2016 te 2018 a duna respectivamente un deficit di Afl. -1,9 miyon; Afl. -4,8 miyon y Afl. -5,2 miyon. Mester conclui anto cu posiblemente e cifranan aki no tin ningun validez real? Y si esey ta e caso, mester cuminsa sospecha tambe di e validez di cifra di otro entidadnan?
Den e Memorie van Toelichting di e proyecto di ley entrega recientemente na parlamento, gobierno mes ta practicamente cuminsa su splicacion cu e constatacion cu ‘Serlimar ta lucha cu deficitnan financiero’. Segun e splicacion duna, esey tin di haci na prome luga cu e ‘accionnan deficiente di impone y cobra e actual compensacion pa recoge desperdicio’. Despues ta pasa inmediatamente na referi na e hecho cu e cobransa actual no ta diferencia entre persona cu entrada modesto y otronan cu tin mas entrada. Loke no ta splica aki cu esey realmente no tabata y ta e problema. Como cu un gran mayoria no a paga y e empresa no tabatin e conocemento ni e capacidad administrativo pa cobra, por bisa cu dentro di e grupo cu no a paga esnan menos afortuna ta solamente un minoria.
Aki anto tin un punto di mehoracion cu ta independiente di e discusion tocante e consideracion pa e gruponan mas vulnerable den comunidad. Pregunta: con ta mehora administracion financiero di Serlimar? Den su conseho riba e proyecto di ley pa cambia e ley di Serlimar, Raad van Avies tambe ta indica cu gobierno ta referi na e accionnan deficiente den cobransa di e suma cu e cliente mester paga, pero no ta duna di conoce kico ta bay mehora den esaki. Ta parce recomendabel, prome cu hiba guera pa hegemonia den e sector aki, cuminsa cu mehora administracion financiero drasticamente.
