Consul honorario di Francia na Aruba, sr. Christian Mongellaz tabatin un dinner organisa pa Alianza Frances den un restaurant na Playa cu un grupo di conciudadano pa celebra Dia di Independencia di Francia, ora cu nan a wordo sorprendi cu e tristo noticia di e echo terorista na Niza, diahuebs ultimo.
El a bisa cu mayoria di hente no tabata na altura di loke a yega di sosode caba na Niza caminda un persona di 31 aña di nacional Frances pero di origen di Tunisia a mata mas cu 84 persona y mas cu 100 persona herida, tras di stuur di un truck riba un avenida “Paseo Ingles” na Niza.
Noticia
Na momento cu e diplomatico a wordo informa di e atake terorista aki e mester informa di e noticia tristo na tur esnan cu tabata presente.
E tabata un momento dificil unda nan a expresa nan convivencia y solidaridad cu e victimanan y henter pueblo Frances pa medio di un minuut di silencio, asina e diplomatico a declara na Bon Dia Aruba. “E tabata un gesto significante pa e comunidad Frances”, el a bisa.
Victimanan y solidaridad
E comunidad Frances na Aruba ta chikito di alrededor di 20 Frances cu generalmente nan ta traha den e sector Horeca. El a bisa cu a pesar cu nan ta di luto nan lo sigui cu e Tour di Francia cu ta un evento deportivo.
Igualmente nan ta solidario cu e famia di e victimanan. El a bisa cu hopi di e victimanan a keda desfigura. P’esey e diplomatico a elogia cu medionan di comunicacion no a divulga e imagennan di e tragedia aki cu ta uno horibel. Pero sigur autoridadnan Frances lo identifica e curpanan y lo traha un lista di e victimanan.
El a bisa cu ainda nan no sa si mayoria di nan ta turista, pero e ta kere cu e mayoria no ta Frances, ya cu generalmente despues di 11’or anochi no hopi hende ta sali riba caya. Pero e biaha aki e echo terorista a sosode net despues di e show di klapchi, den cuadro di celebracion di Dia di Independencia di Francia. E luga caminda e accion terorista aki a sosode tin casi 2.5 miya di largura y e ta un sitio masha bunita y masha bishita.
Sr. Mongellaz a ricibi algun yamada di solidaridad entre nan di un pareha di Tunisia y creencia Hudiu cu ta bishita nos isla durante 19 aña consecutivo. E pareha aki a lamenta cu Francia ta brinda un oportunidad grandi na e inmigrantenan bin establece cu nan famia pa traha y duna educacion na nan yiunan pa un miho futuro, y Francia ta victima di un tipo di atake asina. E pareha ta considera cu esaki ta un tipo di “traicion”, e diplomatico a bisa. E ta haya cu e pueblo Frances a cuminsa fada di e situacion aki.
E diplomatico a bisa cu e persona interesa pa algun informacion por tuma contacto libremente cun’e na cel 733-9070 of via su e-mail adres; consuldefrancearuba@yahoo.com
