Ayera mainta e docentenan di St. Aloysius School a fada di e situacion deplorabel cu e scol aki ta pasando aden pa varios aña, y nan a dicidi di bay accion pa un par di ora. Ora cu Bon Dia Aruba a yega por a mira cu e muchanan hunto cu nan docente tabata sinta dilanti di nan klas, mientras cu un grupo di mayornan tabata warda un decision pa atende cu e accion aki.
Cabesante di St. Aloysius School, Vladimir de Cuba kier splica cu e accion no ta un protesta contra e gobierno actual den cuadro di eleccion venidero. Mas bien e ta un protesta pa tur gobierno cu a sinta y no a duna e scol aki e atencion mereci. E ta bisa cu e situacion aki no ta uno desconoci ya cu pa varios biaha nan a yega di alerta y vocifera riba e situacion cu e scol aki ta pasando aden. Nan a haci caba pa medio di nan directiva di scol, nan a manda un lista di deseonan cu e scol aki tin, pero nunca e ta wordo concretisa. Pues no ta cuestion cu e ministerio di Enseñansa no sa ya cu via SKOA (directiva di scolnan catolico) nan a yega di trece dilanti nan necesidad y pidiendo atencion pa varios aña caba, e cabesante ta conta nos.
Na 2015 nan a bay den accion den oranan di merdia pa no afecta e lesnan. Nan a prefera tambe pa warda cu pasenshi ya cu nan a wordo bisa cu tin un plan; pero nunca e plan a yega.
“Aworaki nos a yega un punto cu nos ta bisa ta basta y nos ta bay mustra nos mal contento di e forma aki”, asina e cabesante di scol a bisa. Nan ta un cuerpo di 15 docente y 285 mucha.
Situacion peligroso
E motibo di esaki ta cu e scol aki cu den dos aña lo celebra 80 aña di existencia, pa varios aña caba ta den un situacion cu cada bes mas ta bira mas deplorabel y di decadencia di su infrastructura, sin cu niun gobierno a yega di haci algo. Ta asina cu pida di blafon a yega di cay y den diferente klas tin scheurnan masha grandi den muraya locual ta nifica un situacion peligroso pa e docentenan y e muchanan. Tampoco nan no tin un gymzaal propio, sino cu nan muchanan mester haya les di gym constantemente ariba un veld di santo den pleno solo. Tur esaki ta causa cu den cierto momento e ta bira frustrante y iritante, segun meneer De Cuba. Nan ta kere cu a yega ora pa e scol aki por haya un renobacion completo. Nada di trabou di cosmetico di drecha y verf un tiki ya cu e problema y daño den su infrastructura ta considerabel.
Molester di stof y calor
Tambe ora cu tin cierto actividad riba e veld di futbol pariba nan scol of autonan ta core riba e caminda di santo cu ta pasa rond di dje, nan muchanan specialmente ta sufri inmensamente di e molester di stof. Esaki ta ocasiona cu tin muchanan cu ta bira malo pa motibo di alergia ocasiona pa stof aki. Nan no por mantene e klas cera ya cu e muchanan ta bay sofoca di calor, ya cu e scol aki ta sufriendo pa e calor inmenso specialmente den e temporada aki. E muchanan tin biaha ta haya les den klas cu temperatura di 31 pa 32 grado celsius; te hasta e por bay te 41 grado celsius, pues un diferencia di 10 grado. “Nos scol tin mester di airco. Cerca nos e no ta un luho”, e ta bisa.
Palabracion concreto
Despues di e accion di ayera nan ta bay spera kico lo pasa. Nan ta spera cu lo por bini un palabracion concreto logrando un reunion cu hendenan mas ariba di departamento di enseñansa te hasta cu e minister encarga riba e tereno aki. Nan lo desea pa haya un fecha fiho caminda St. Aloysius School lo ta na turno pa trabou di renobacion y cu nan por haya un gymzaal adecuado. Aunke e accion di ayera tabata pa un rato wardando, e no por bisa si nan ta intensifica awe of mañan e accion aki te ora cu nan por haya un contesta concreto pa atende cu nan preocupacion.
E scol aki ta cay bou SKOA, e kier bisa cu no ta cuestion cu SKOA no a duna atencion. Ya cu SKOA a purba y te hasta a manda un lista di e scolnan cu ta den necesidad grandi pa haya un renobacion. Tur aña nan ta yena un lista unda nan ta pone e necesidad cu e scol tin pa aplica na e presupuesto asigna. Y na su turno SKOA a manda esaki na e departamento concerni. Pero fei cu sr. De Cuba ta cabesante esaki ta tumando luga pa 11 aña caba, y e no wak casi cu un cambio a tuma luga.
El a bisa cu e mayornan tin comprension y te hasta nan a mustra nan solidaridad cu e accion aki. Na 2010 e scol aki tabatin un sorto di bentana di aluminium ‘cu ora bo ta cera un, dies ta cay’. Cu ayudo di e mayornan haciendo actividadnan pa recauda fondo, nan a logra cambia e bentananan pa uno mas adecua. Tambe nan tabatin otro problema cu e pos di scol. Pa cuater aña largo no tabatin placa pa pone un simpel pos. Nan mester haci otro actividad pa cera e suma di alrededor di 6.500 florin pa traha un pos nobo. Pero e ta haya cu no ta intencion pa cada biaha cu ta surgi problema cu e scol, nan tin cu pidi e mayornan pa contribui cu placa of organisa un fundraising. “Cu bo mester renoba un scol a base di fundraising di e mayornan, mi no ta haya corecto.”
Locual ta wordo pidi ta un acumulacion di problema cu no a wordo atendi debidamente pa basta aña caba. Sinembargo den cuadro di aña escolar nobo cu a caba di habri, e biaha aki nan a dicidi di bisa cu ta basta.
Reaccionnan negativo
Ayera tabatin algun reaccion cu e accion aki lo por afecta e muchanan. E cabesante no sa kico lo por afecta e muchanan mas hopi: Un ora y mey cu nan no a haya les of keda traha hunto cu e muchanan henter e aña escolar atrobe den un klas cu temperatura halto y den un scol den mal estado.
E ta corda cu un par di aña pasa ora cu e hos a ocasiona daño na e misa y Santa Anna School na Noord. E tempo aya St. Aloysius School pa motibo di problema asbest di e scol bisiña cu a cay den nan tereno a keda cera seis siman. Pero nan a traha un plan y nan a recupera e tempo perdi y nan a logra cu algun di e muchanan aki a bay Colegio Arubano (Havo/VWO) y Mavo. Solamente aña pasa nan tabatin 14 mucha cu a bay Colegio. Pues e no ta kere cu e tipo di accion aki lo por tin efecto pa e muchanan, ya cu den pasando nan a logra pone e muchanan up date pa hopi di nan bay colegio avansa
Otro reaccion expresa den medionan social tabata cu e accion aki tabatin un contenido politico den cuadro di eleccion venidero. Cabesante di scol aki ta retira cu nan accion no ta un protesta contra un minister actual, sino cu e ta un protesta contra tur gobierno. Pero e ta spera cu cual gobierno cu sinta den futuro sa di duna St. Aloysius School su atencion mereci.
