Poco dia despues cu un accion di colecta a tuma luga pa yuda e victimanan di e inundacionnan na Peru, otro pais bisiña di nos tambe a resulta afecta pa e fenomeno conoci como “El Niño Costero”.

Ta trata di e localidad di Mocoa, parti sur di Colombia, unda te ayera alrededor di 311 a fayece di  nan 100 tabata mucha. Tin alrededor di 332 persona herida y mas cu 300 hende a disparce. Den e shelternan tin como refugio mas cu 1.200 mucha y 97 hende muhe na estado.

Fundacion  Movemento Integracion di Aruba (MIA) a colabora cu e victimanan di Peru; y e biaha aki nan ta mustra nan solidaridad cu e pueblo Colombiano di Mocoa tambe.  Nan meta ta pa colecta 100 mil florin cu nan lo manda pa Cruz Cora  na Colombia cu lo ta encarga pa e ayudo aki por yega cerca victimanan di e tragedia na Mocoa.

Accion di colecta
Na final di un radiothon cu lo tuma luga mañan tur e placa colecta lo wordo conta dilanti publico presente  cu lo fungi como testigo. Su dia siguiente lo wordo deposita na Aruba Bank y manda via transaccion  bancario pa e cuenta di Cruz Cora na Colombia. Esaki ta e forma mas safe pa e ayudo aki por yega mas lihe na esunnan cu tin mester, segun e organisacion, ya cu e ayudo ta hopi necesario. Pa garantisa transparencia nan lo publica e recibo di e transaccion bancario aki.

Consehero di MIA,  Radi Abdoel-Khan a declara na Bon Dia Aruba cu e fundacion aki a bin cu e iniciativa di realisa un colecta di tres dia cu a cuminsa ayera y ta sigui awe. E colecta ta tumando luga na diferente caminda entre nan Ling & Sons y Super Food; tambe dilanti di Don Jacinto Restaurant, Parlamento di Aruba y e rotonde di Tanki Flip for di 12’or di merdia te cu 7’or anochi.

Mañan lo tin un radiothon for di 8’or di mainta te cu 8’or anochi na Plasa di Condor of Gradicimento dilanti di Prince Smart, caminda  nan a haya colaboracion di emisora Latina, Caliente y Power Fm. Den e actividad aki lo bay tin banda musical, dino jump y actividad recreativo pa e muchanan.

Nan ta haci un yamada na tur instancia y companianan cu kier haci algun donacion di cuminda y bebida no alcoholico pa e actividad di diadomingo awor, ya cu esaki por yuda pa recauda fondo pa Mocoa.  Tambe  fundacion MIA  kier haci un yamada na pueblo di Aruba pa colabora cu e ayudo humanitario aki pa e hendenan di Mocoa, ya cu tur cen ta yuda pa logra e meta di 100 mil florin. Mirando e bon curason di e pueblo di Aruba en general, y considerando cu e comunidad Colombiano ta uno grandi riba nos isla, sr. Abdoel-Khan ta bisa cu no ta duda cu fundacion MIA lo por logra e meta di 100 mil florin cu e apoyo di tur hende.